Godigo Nogi Ugwaba Sabo Tęąbi Po Wabo Buku Dabe 88:3-17

³Te sęgę hauwa enaba pedalubaso, tama te tebogo naga ena pąde isabo homu ebao.

⁴Ena te gasa bidi dabe isainu ebo tiwai gilama yai. Te eno bomo tigidali mu silalio.

⁵Augwa ena tagalubaso, tama ena te isali bidi dabe dali bidibao. Ena te gasa bidigo ela muai bidi tiwai gilama, tama te gų pagede munaluai. Ena te bidi dabe nago te homu kone mu gegeda palubo bidi dabe tiwai gilama yali, tama te nago augwali munu ma tau sisąbo tiwai yai dao.

⁶Nago ena te aiyanu mu yai dedage pageba sąnama, tama ena te be hulia sai mude, te aiyadu dologode mu bidai.

⁷Nago haliga sębęgo ena mu elaluama, tama te moni tamu ąį dinigo ena mu mesegelibo tiwai yai dao.

⁸Nago te ena abagi dabego ena tudi ola momainu ilali. Nago ena te dwai mu pedalumainu elama, tama augwaligo enade wi mu yai. Tego ena kalabus ilama, tama eno pedelabo usu meni yai dao.

⁹Ena dene tolu, tama eno gedu dolama, tama eno bugagia suabo usu isąwai. Tama tigidali sogo eno gedu haluasa po nageba weyu, te nago ena tau somainu yali.

¹⁰Nago te isali bidi dabe tau sabo bomai sę ebo da, agawe? Te isali bidi dabe ma hodaluama, tama nago nogi ugwaba saibawe?

¹¹Te gų pagede te isali bidi dabego nage dali po miyu, te nago augwali sesemane wei mu ebo da po wabo da, agawe? Te dolabo bulude augwaligo nageba po weyu, te nago augwali bugagia tonaluai dao po wabo dawe?

¹²Te gų pagede bidibo bidi dabego te nago bomai sę ebo subo dawe? Tama te dolabo pesagede bidalubo bidi dabe, augwaligo nago te wiegi yai kolesaga subo da, agawe?

¹³Genuai Bidi, eno nageba i wabo, te nago ena tau somainu ebao. Te tigidali sogo kigamu eno gedu haluasa po wabo dao.

¹⁴Tiali goli, Genuai Bidi, magi baso ena nago tudiba mubawe? Magi baso nage enade geme duala sobawe?

¹⁵Te ena gesi ogwa bidide digi gagalasa, te e sogoba megi usu nagasobao, ena te sęgę tolu, tama pąde ena isainu ebao. Nago enaba te dene mabogo te ena nogo sągą dili kimi isalio.

¹⁶Genuai Bidi, nago haliga sębęgo ena mesegelali. Nago ena dodolagia mu elama, tama ena mu dolai dao.

¹⁷Nago enaba te tiwai te giligade me hulide dali yai, tama te bidi dabego ena te tigidali pedai badu pobeasa bilali, te wę ge bo deyu, te tǫ tigidaliba mesega sabo tiwai yai dao.