SALMOS 83:9-17

⁹Xiquinchihuili san se quej tiquinchihuili tali Madián ehuani, o quej tijchihuili Sísara huan Jabín ehuani ipan hueyat Cisón.

¹⁰O xiquinchihuili quej tijchijqui ica mocualancaitacahua ipan tali Endor. Inijuanti inintacayohua mocajque tepejtoque talchi huan elque quej abono para tali.

¹¹Xijchihua para nopa tacame cati tahuel tejtetique ma miquica quej Oreb huan Zeeb quinmictijque. Huan nojquiya xijchihua para inintayacancahua ma miquica quej nopa tanahuatiani Zeba huan Zalmuna.

¹²Pampa inijuanti quiijtojque: “Ma timoaxcatica nopa tali cati iaxca Dios.”

¹³NoTeco Dios, xiquinsemana ica moijyoyo quej elisquíaj taltepocti, o quej tasoli cati quihuica ajacat,

¹⁴o quej se hueyi tit cati quitamitatía se cuatitamit.

¹⁵Xiquinquixti ica huejhueyi tit, ica tatomonilot, huan ica huejhueyi ajcomalacat.

¹⁶TOTECO, xiquinpinahualti nochi hasta mitzixmatise ta huan mohueyi chicahualis.

¹⁷Ayecmo ma quimatica taya quichihuase. Ma mopinahualtica huan ma huetzica ipan majmajti.