Ola Saam 83:9-17

⁹God, yu panishim olabat seimwei jis laik yubin dum langa ola Midiyan pipul. Yu binijimap olabat jis laik yubin binijimap Sisera en im king Jeibin, deya langa det Kishan Riba,

¹⁰gulijap langa det taun gulum Endowa. Deya na yubin bidim olabat en olabat bodi bin jidan nogudwan langa graun.

¹¹Yu bidim ola boswan blanga olabat jis laik yubin dum langa Oreb en Sib en langa Seba en Seilmuna.

¹²Olabat na bin tok, “Nomeda det kantri blanga God, melabat garra teikoba en meigim im blanga melabat ronwan kantri na.”

¹³God, yu spredimat olabat jis laiga das, en jis laiga draiwan gras weya det win oldei blowimweibat.

¹⁴Jis laik faiya wen im barnimap ola tri, en jis laik lilwan faiya wen im stadimap bigwan faiya langa ola hil,

¹⁵wal yu andimwei olabat garram yu strongwan win, en yu meigim olabat bradin garram yu jigiwan win en laitining.

¹⁶YAWEI, yu meigim olabat jidan sheimwan, en yu meigim olabat sabi det pawa blanga yu.

¹⁷Nomo larram olabat win en meigim olabat jidan brabli bradinwan olagijawan. Larram olabat sheim brabliwei en dai.