SALMOS 60:2-11

²Ni tali tijchijqui ma huihuipica ica majmajti. Tahuel tijtaijyohuiltijtoc. Huajca ama, noTeco Dios, sempa xijcualtali total cati tamitatapacatoc.

³Tijchijtoc para tojuanti timomasehualhua ma tijpanoca huejhueyi taijyohuilisti. Huan ica ni taijyohuilisti techchijtoc ma timomimilojtinemica quej elisquía tiihuintitoque.

⁴Pero ama techmacatoc nochi tojuanti cati timitzimacasij huan timitztepanitaj quej se bandera campa timosentilise. Huan quena, nochi tojuanti cati tijchihuaj cati melahuac timosentilise nopona, para timomanahuise quema tocualancaitacahua techmajcahuilise cuataminti.

⁵Technanquili huan techmanahui nochi tojuanti cati techicnelía. Xijtequihui mohueyi chicahualis para techmanahuis.

⁶Toteco Dios, yaya cati itztoc ipan ichaj nepa ilhuicac quiijtojtoc: “Ica paquilisti nijxelos tali Siquem, huan nijtamachihuas nopa tamayamit cati itoca Sucot, para nijmacas aqui nijnequis pampa nopa talme noaxcahua.

⁷Huan nopa tali Galaad huan Manasés nojquiya noaxcahua. Ipan tali Efraín hualase nosoldados cati nechmanahuise quej notzontzajca, huan ipan tali Judá hualase notanahuatijcahua.

⁸Cati itztose ipan tali Moab elise notequipanojcahua cati teicneltzitzi. Cati itztoque ipan tali Edom nechtequipanose. Huan nitahuejchihuas chicahuac quema ya niquintantos nopa filisteos.” Quej nopa quiijtohua Toteco.

⁹¿Ajquiya nechchihuas ma nicalaqui ipan nopa altepeme cati moyahualtzactoque ica tepamit ipan tali Edom? ¿Ajquiya nechchihuas ma niquintani sinta amo ta?

¹⁰San ta techyacanas ipan tatehuilisti, noTeco Dios. Amo techtahuelcahua. Sinta ta amo tiyas ihuaya tosoldados para tatehuise, Toteco, amo aqui techpalehuis.

¹¹Quena, Toteco Dios, techpalehuis para tiquintanise tocualancaitacahua, pampa inintapalehuil masehualme, amo teno ipati.