Mbouŋ to Yes Israela 60:2-11

²Ndug tiei isami wa. Malmal to ivot ne, nene inimale ugham taan tiei irur le ivavaal, ve avo ikaak. Tovenen nitaŋ roran ghom nighaze ugharaat mulin ndug tiei. Pa vene, nisami kat.

³Yei tamtoghon tiom. Eemoghon ugham pataŋani tiina kat ivot payei. Nighita sawa tonene samia kat. Mbalmbali tiom iza tiei, le igham ghei niwaghamgham inimale upaghun ghei pa ya ariaŋa.

⁴Sawa to pataŋani tonene ighaze ivot payei, yom upatooŋ pilak tiom pa yei to nimatughez payom ve nitaghon ŋgar tiom. Leso niŋarua ghom nilat, ve upoon ghei pa koiamai.

⁵Maaron, yei niwatag: Lolom ineep tiei kat. Ulooŋ suŋuuŋ tiei tonene, ve upatooŋ tapirim ve uul ghei. Ugham mulin ghei pa pataŋani tonene.

⁶Muuŋ, Maaron ineep izi ndug toni patabuaŋ, ve isaav ighaze: “You naparab le nalib pa koiagŋa wa. Tauto tinig iza, ve navalag taan Sekem ve taan raapa to Sukot, ve nareii irau tamtoghon tiou.

⁷Taan suruvu to Gileat, ve taan to yes Manase paam, nene you tiou. Rumai to yes Epraima tinimale hat ariaŋa to napoon dabag pa malmal. Ve rumai to yes Yuda tinimale titi to nakisi inim ghilalooŋ pa pooz tiou.

⁸Taan suruvu to yes Moapa, nene inimale oon tiou to ririwaaŋ. Ve taan suruvu to yes Edoma, nene ndug to napiyaav duduuŋa to agheg izala. Ve yes Pilistia, you naparab toman di le nalib padi. Tauto tinig iza ve nalool.”

⁹Sei irau igham ghou nalib pa koiagŋa ve nalooŋ nala ndug todi to didiiŋ ariaŋa iluvuti we? Sei pale imuuŋ payou, ve ighereb ghou nala navot taan suruvu to yes Edoma? Ite paam maau. Yom moghon.

¹⁰Eemoghon Maaron, aazne yom upul murim payei, ve unum toman ndaaba tiei muul maau.

¹¹Maaron, uul ghei nilib pa koiamai. Pasa ulaaŋ to nighamghami ila to tamtoghon, nene iraua maau. Nene mbeb sorok.