SALMOS 47:2-7

²Žaḻa' žébežo X̱anžon', Bennen' nape' dot yeḻa' wak. Nake' Benne' Wnná Bia' Ẕen, na' ẕnna bi'e dot yežlyó.

³Bdie' benne' zi'to' ka' ḻo na'žo. Bnnite'e žo'o nich nna bia'žo yež ka'.

⁴Beké'e yežlyó nga ḻo ná'gake', na' bennen' chežo, na' naken to yežlyó x̱tanḻe'e che ẕa'só Jakob ka', benne' ka' nži'ile'.

⁵Ẕben Dios gan ži'e ẕnna bi'e. Ẕbéžegak lozgak bia ka' kate' ẕben X̱anžon' ga na'.

⁶¡Le goḻ da' wká'n ẕenle Dios! ¡Le goḻ! ¡Le goḻ da' wká'n ẕenle Bennen' ẕnna bi'e žo'o!

⁷Dios nake' Benne' Wnná Bia' Ẕen dot ḻo yežlyó nga. ¡Le goḻ chie' ḻen dot yeḻa' žejní'il chele!