Salmos 40:3-14

³Wizpurpa nuwaa kuki murimash wayarangu, nuwsha kaneeschee yaseesshish yaseekuri, Apanllee, Wappari, tárangina. Tputssha nuwaa parangusin, punirustarangusin, Apanllimunarisha mang' taturangtamanaya.

⁴Yuw tputs Apanllee chinaku an mang' kis taachiya. Tputsee yutaritshishpani izuuru mapiykiya. Yuwaa apanllputsee ungirtakana anungaz nda chinachiya, watam Apanllee kapung chinakuwa.

⁵Apaa, nuw shiyaa apartana. Iyashchee istamaam kapung chinarangush, wizpurpatatish istarangsha. Wanip iyaa istarangsha. Tputsee kamanpi, atitaati, pinasakani, watam ichingaru kamanimaam wanindaja. Shiyapat tatsamaam wanindaja.

⁶Tputs chinuzee pachayarusin, muchkusin, anumun shiy nda mangish ksaksha. Shiy anumun yutaritshishee yaramaam nda kapung chinaksha. Mishat, tirikoo pangishish yushindakuni, anumuntam nda mangish ksaksha. Itaru, Apaa, shiy nuwaa tsiyatkush, K'keetsi zurampatari tuminungcha, tárangsha.

⁷Ashirucha, nuwsha shiyaa, Tputsip nuwaa zanganingandama, Shiy nuwaa kirakarishish kamanirangsha. Ashiri nuwsha,

⁸shiyaa kukish tuminumaam mangi kizpur ksakina.

⁹Ashiri shiyashchi tputs shaniykusin, anush shiyaa kamachtamareetsish tatsamooru tayaspatakina. Nda minumtiyam niyrkina. Shiysha anoo yasaksha, Apaa.

¹⁰Nuw nda zamaruri taakina. Shiyaa kukish tsinsampaneetsish uru tputsee kamankuri taakina, atina. Apanll uru iyaa ksutku taakiya. Iyaa tapachindachiya. Tsipakchuni iyaa waanpee machchiya, nuw tputsee tayaspatakuri atina. Shiysha Apaa, uru iyaa chinakush, istaksha. Ayamtaatiyam shiy chinashish pastacheeja. Shiy kukish urutamari tputsirishish taachiya.

¹¹Apaa, shiy nuwaa ksarishpa. Urutamari nuwaa chinakush taangcha. Shiy tsinsampantishcha.

¹²Nuwaanamandari chayari zapan xarashish nuwash tushiykiya. Nuw yutarit zapan ashirangi anoo ichingaru kamanimaam pinasakina. Na nuwaa xarashish kámanakcha. ¿Tamayareezi nuwaana yutarit ashirangi anoo tushiychee? Zapan taaru anoo nuw táchimaam pinasakina. Muchishi zapan kasiru taariya. Ashirucha, mangi tsíparangu, izuuru sambaytarangina.

¹³Apaa, nuwaa nayaningandama. Yutaritshishireetsi tchingangandama. Mikeerush nuwaa istanda. Zapshtarinllpa.

¹⁴Mishat tputs nuwaa pachamaam zandkitamsinaya. Ashiri shiysha yuwaa tputs nuwaa tayutaritkana anoo ipazangcha. Waani paziksin suwasuwachinllinpa.