Buk Song 40:3-14

³Em i givim mi wanpela nupela song, em song bilong litimapim nem bilong God, em God yumi save bilip long em. Bai planti man i lukim mi na bai ol i pret na bilip long Bikpela.

⁴Man i save bilip long God, em i ken amamas. Kain man olsem em i no save bihainim ol bikhetman, na em i no save lusim Bikpela na lotu long ol giaman god. Nogat tru.

⁵God, Bikpela bilong mi, yu bin mekim planti gutpela wok bilong helpim mipela. I no gat man i olsem yu. Yu winim ol tru. Sapos mi autim tok long ol man na tokim ol long wok na tingting bilong yu, olaman! Dispela i moa moa yet! Mi no inap kaunim ol samting yu bin mekim bilong helpim mipela.

⁶Yu no laikim ol abus ol i save kilim bilong mekim ofa. Ol ofa ol i save kukim olgeta long paia na ol ofa bilong rausim sin, em tu yu no save laikim. Tasol yu bin kirapim laik bilong mi, na mi bihainim tok bilong yu.

⁷Orait nau mi tok olsem, “God, mi kam pinis, olsem bipo ol i raitim tok long mi long buk.

⁸God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.”

⁹Bikpela, mi bin autim gutnius long taim ol planti lain manmeri bilong yu i kam bung. Mi tok olsem, “Bikpela i save kisim bek yumi.” Bikpela, yu save pinis, bai mi autim dispela tok oltaim. Mi no ken pasim maus.

¹⁰Yu bin helpim mi na kisim bek mi, na mi no haitim dispela. Mi tokaut pinis olsem yu save bihainim tok tru bilong yu na yu kisim bek mipela. Yu save laikim olgeta manmeri na yu bihainim pasin tru, na mi no haitim dispela long ol manmeri i bung bilong lotu. Nogat. Mi tokim ol pinis.

¹¹Bikpela, mi save yu no inap pasim sori bilong yu. Nogat. Yu save sori long mi oltaim. Yu save laikim mi na bihainim tok tru bilong yu, na long dispela pasin yu save lukautim mi oltaim.

¹²Planti hevi i save kamap long mi, na mi no inap kaunim ol. Ol pasin nogut mi bin mekim ol i daunim mi pinis, olsem na mi no moa lukluk gut. Ol pasin nogut i kamap planti moa, na i winim namba bilong gras bilong het bilong mi. Bel bilong mi i malumalum, na mi no gat strong moa.

¹³Bikpela, plis yu ken kisim bek mi. Bikpela, yu kam hariap na helpim mi.

¹⁴Sampela man i laik kilim mi i dai. Yu mas daunim ol na paulim ol tru, bai ol i sem nogut. Na sampela man i save amamas long ol hevi bilong mi. Yu mas rausim ol i go bek na daunim nem bilong ol.