Yaburina 40:3-14

³A n ba yili ɲaxin na, a n ba boron nun bɛndɛni. A yi n ti fanyen fari, a san tide faɲin fi n ma.

⁴A yi n xaran bɛti nɛnɛn ma, n na en ma Ala tantunma naxan na. Muxu wuyaxi na toma nɛn e yi gaxu a yɛɛ ra, e mɔn yi e yigin sa Alatala yi.

⁵Sɛwan na kanna xa, naxan na a yigi sa Alatala yi, naxan mi kidene batuma, naxan mi a sama suxure batune ma.

⁶I ya wali faɲine wuya ayi! Alatala, n ma Ala, i ɲɔxɔn mi na! I bata kabanako fe wuyaxi yitɔn nxu xa! N mi nɔɛ e fe falɛ, e yatɛn bata gbo ayi!

⁷I mi waxi saraxan nun kiseen xɔn gbansan, fɔ i n tunle raba ayi. I mi yi saraxa gan daxine nun yulubi xafari saraxane gbansan fɔxɔ ra.

⁸Nanara, n naxa, “N tan ni i ra. N bata fa. N ma fe sɛbɛxi Kitabuni.

⁹N ma Ala, i sagoon nafan n ma! I ya sariyan namaraxi n bɔɲɛni.”

¹⁰N tinxinyaan nalima nɛn i ya yamani. Alatala, i a kolon, n mi n dundɛ.

¹¹N mi i ya tinxinyaan namaraxi n kedenna xa. N ni i ya ɲɔndin nun marakisina fe falama nɛn. N mi i ya hinanna nun i ya lannayaan luxunɲɛ yamaan ma.

¹²I nama tondi kininkininɲɛ n ma, Alatala. I ya hinanna nun lannayana n marama nɛn waxatin birin.

¹³Amasɔtɔ, n ma tɔrɔne bata wuya han e mi yatɛ! N hakɛne bata n suxu, n mi fa se toma. E wuya dangu n xunsɛxɛne ra. Bɔɲɛ yixɔdɛxɛ mi fa n yi sɔnɔn.

¹⁴Yandi, Alatala, n nakisi! Alatala, fa n mali iki sa!