SALAMO 40:3-14

³Lohiabada ese ane matamata lau dekenai ia hadibaia. Inai be Dirava hanamoa anena. Taunimanima momo ese inai kara do idia itaia, vadaeni do idia gari, bona Lohiabada dekenai do idia abidadama.

⁴Lohiabada ia abidadama henia tauna be namo. Unai bamona tauna ese, hekokoroku taudia ia matauraia lasi, bona ia ese Lohiabada do ia rakatania lasi, dirava koikoi dekenai do ia lao totona.

⁵Lohiabada e, lauegu Dirava, oiemu durua karadia ai dekenai be momo herea. Tau ta be oiemu kara bamona ia karaia diba lasi. Lau ese oiemu kara, bona oiemu laloa, be taunimanima dekenai lau ura gwauraia, to lau be hegeregere lasi momokani. Badina oiemu kara bona laloa be momo herea, duahia diba lasi.

⁶Oi ese vamu alaia boubou gaudia, bona boromakau alaia, bona gabua ore gaudia oi ura lasi. Unai bamona boubou gaudia, kara dika kokia totona oi ura lasi. To oi ese taiana lau dekenai oi henia, vadaeni oi dekenai lau ura kamonai.

⁷Vadaeni lau gwau, “Lohiabada e, oi itaia, lau mai inai. Oiemu Buka ese lau ia hadibaia dahaka do lau karaia.

⁸Lauegu Dirava e, lau ura dikadika oiemu ura do lau karaia. Oiemu taravatu be lauegu kudouna lalonai ia noho.”

⁹Lohiabada e, lau ese oiemu taudia momo edia vairanai, hamauria sivaraina lau gwauraia hedinarai. Lohiabada e, oi diba vadaeni, lau ese inai Sivarai Namona, be nega ibounai do lau gwauraia. Lauegu udu bibina do lau koua lasi.

¹⁰Oi ese lau oi hamauria vadaeni, bona inai Sivarai be lau ese lau hunia lasi. Oiemu abidadama namona bona oiemu durua, be nega ibounai lau ese lau gwauraia hedinarai vadaeni. Oiemu taudia edia hebou badana lalonai, lau ese oiemu lalokau badana, bona oiemu hereva momokani lau hunia lasi.

¹¹Lohiabada e, oiemu bogahisihisi, be lau dekena amo do oi kokia lasi, vadaeni oiemu lalokau bona oiemu hereva momokani, oi ese oi badinaia noho gaudia, ese lau do idia naria nega ibounai.

¹²Dika momo herea be lau dekenai idia ginidae vadaeni, duahia diba lasi. Lauegu kara dika ese unai dika idia havaraia vadaeni. Unai dainai lauegu matana ese, gau idia itaia namonamo lasi. Unai dika be momo herea, lauegu kwarana ena huina edia momo idia hanaia. Lauegu kudouna ia manoka lao noho, bona egu goada ia ore.

¹³Lohiabada e, mani emu kara lau do oi hamauria. Lohiabada e, lau do oi durua haraga.

¹⁴Lauegu mauri hadokoa daladia idia tahua taudia, be do oi hahemaraia, bona laloa daradara do oi henidia. Lau idia hisihisi henia taudia, be mani do oi luludia lou, mai hemarai danu.