Godigo Nogi Ugwaba Sabo Tęąbi Po Wabo Buku Dabe 40:3-14

³Agai te gesi tęąbi po me deli enaba mani, te agaba konealubo homu dąų wabo God nogi ugwaba sabo tęąbi po dao. Te bidi hauwago te agai enade yali sę po odolama, tama augwa wi elama, tama augwa te Genuai Bidiba konealubo homu dąų omainu yaibao.

⁴Bidigo konealubo homu te Genuai Bidiba dąų wabo bidi da, te aga wiegi yai homu pemene yao. Te hagoma ebo bidi dabe wali pisąbo bidi tiwai, tama te Genuai Bidi me tagalisiąma, tama te tibo god dabeba lotu po me wagobeo. Mu menio.

⁵Genuai Bidi, eno God, nago te da tau sabo sę wiegi yai hauwa yali. Te nage tiwai bidi me elalubeo. Nago augwali aiyaba mu elaluali. Eno te bidi dabeba po pusuyu, tama nago sę me homude po weyu da, ya tegobao! Te umabo umabo mu yaibao. Eno nedebaso, usu me egobeo.

⁶Nago te augwaligo elama ofa ebo kibu dabe te wei ebeo. Te tobage augwaligo te siaba tigidali ulama domainu te sęgę sela sąbo ofa, te me nago wei me isiąwai. Tiali goli, nago eno homu hodolobaso, tama eno nago po wali pabo dao.

⁷Tialima, megi eno e tama obao, “Suao. Ena asalio. Te nago bomai po elalubo bukude nago homugo te eno emainu yabo sę asęanio.

⁸Eno God, eno te nago homu wali pabo wei mu ebao. Te nago bomai po te ena haliga tomode elalubao.”

⁹Genuai Bidi, eno te nago bukude po pusubo sę te nago we bidi dabe sisinibo tomode wai dao. Eno te tama po wai, “Genuai Bidigo te da ma sabo dao.” Genuai Bidi, nago koneani, eno te po sesemane pusaibao. Eno pedauwali me pania sogobeo.

¹⁰Nago ena tau selama, tama ena ma sali, tama te eno me geme dualubeo. Te nago naga mu po te wali pelama, tama te nago da ma sabo da po eno pusalio. Nago te tigidali we bidi wei mu eyu, tama nago mu kolesaga wali pobaso, tama eno te lotu wainu sisinibo we bidi dabeba eno me dualubeo. Menio, eno augwaliba wai dao.

¹¹Genuai Bidi, eno koneani, te nago homu dene eyu, tau sabo sę ebo te palia sogobeo. Menio, nago ena sesemane sogo homu ebo dao. Nago ena wei eyu, tama naga mu po te wali peyu, tama tebo kolesagade te nago ena sesemane sogo tonalubo dao.

¹²Te sęgę hauwa enaba pedelali, tama te augwali eno nedebaso, usu egobeo. Te dwai kolesaga dabe eno yali, tego ena aiyaba elalualio, tama eno bugagia me tonono me ebeo. Te dwai kolesaga hauwa mu pedelama, tama te eno tobolude elalubo tobolu nisi namba te aiyaba elaluai. Eno homu kolesaga tigidali tuloluai, tama ena bomo meni yai dao.

¹³Genuai Bidi, ao, te nago ena ma sao. Genuai Bidi, te nago ena polo tau sao.

¹⁴Te bidi mebago ena ela muainu ebao. Nago augwali elalu, tama augwali homu kone mu tuą palama, te augwali dwai hale somainao. Te bidi dabego eno sęgęde wiegi yai pemene ebao, nago augwali ma sela sąnama, tama augwali te elaluao.