SALMOS 28:2-5

²Xijcaqui nocamanal quema nimitztajtanía tapalehuili. Techchihuili cuenta quema nimomatanana huan nitachía imelac motiopa cati tahuel tatzejtzeloltic.

³Amo techtatzacuilti inihuaya masehualme cati amo cuajcualme cati san quichihuaj cati amo monequi. Inijuanti camanaltij cuajcualtzi ica sequinoc, pero quipiyaj nochi cati amo cuali ipan iniyolo.

⁴Xiquincuepili nochi cati amo cuali quichijtoque ica cati amo cuali nojquiya. Xiquintaxtahui ica cati fiero san se quej fiero quinchihuilijtoque sequinoc.

⁵TOTECO, inijuanti amo quichihuilíaj cuenta nochi cati tijchijtoc, huajca tiquintzontamiltis huan amo quema tiquintananas sempa.