SALMOS 28:1-7

¹X̱ana' Dios, žḻiža' Le'. Le' žape chi'ikzo' neda'. Bze nag chi'a dan' cha' bi yenlo' chia' gaka' ka to benne' žoe'e ḻo yi' gabíl.

²Benle chi'a dan' žḻiža' Le', na' ẕchis na'a ḻawo' Le' gan zo' latje la'y chio'.

³Bi wžía yi'o neda' tẕen ḻen benne' wen ḻaže' ka', na' kege tẕen ḻen benne' ka' žóngake' da' ẕinnj. Ẕnnágake' da' cháwe'do' ḻawgak ljéžgake' ka', san da' bi nak chawe' yo'on yichj ḻáẕdo'gake'.

⁴Bde benne' ka' ḻo da' sáka'ḻe'egake' tḻebe kan nak da' béngake', ka nakkze da' bi nak chawe' da' béngake'. Bneẕjw benne' ka' tḻebe kan nak da' béngake', dan' yeyáḻa'gake'.

⁵Dan' bi wdápegake' ba la'ne da' ben X̱anžon', na' kege dan' bene' ḻen na'kze', Ḻe' wžía yi'e benne' ka', na' wdíe' ḻégake' ḻo da' sáka'ḻe'egake'.

⁶¡Ga'n ẕen X̱anžo Dios, Bennen' benle' chi'a katen' bḻiža'-ne'!

⁷X̱anžo na'kze ẕze choche' neda', na' žape chi'e neda'. Bx̱en ḻaža'a Ḻe', na' gókḻene' neda'. Che ḻen yebéḻe'ela', na' goḻkza', na' wká'n ẕenkza' Ḻe'.