Mboe 28:1-7

¹Mboe ki Dabit O Yooba, nu ta tuŋ ŋonoono. Pa nu pombolmbol yo mi poroukalkaala yo. Tana iŋgi bobi tio ima ku be uulu yo. Ŋgun talŋom pa suŋŋana tio ti. Kokena tit kalŋoŋ, to aŋgaaba zin wal ta tisula len Andewa na, mi aŋla leŋ.

²Iŋgi aŋsara nomoŋ ima urum ku leleene ta potomŋana kat na, mi aŋtaŋroro u be uulu yo. Leŋ tiŋiizi tio ti mi muŋai yo. Pa nio mbesooŋo ku tau.

³Zin wal sananŋan ta tiute u som mi tinok sanaana kamŋana na, ziiri yo raama zin pepe. Kokena niamŋan amla leyam. Wal tana kwon na, izzo sua pizin tomtom kembei lelen be ziŋan tiparlup zin ma tiwe tamen. Tamen lelen na, iurur be tipasaana zin.

⁴Pokot mbulu sananŋana ta tikamam na. Pa naman imbel sanaana kamŋana kek. Tana ur kadoono pizin mi pokot mbulu kizin.

⁵Pa uraata bibip ki Yooba mi nama muriini na, tikam ŋgar pa risa som. Tana ni ko ipambiriizi zin ma timap kat. Ko irao timaŋga mini na som.

⁶Nio aŋpakur Yooba zaana! Pa nio aŋtaŋroro i be imuŋai yo, mi ni ileŋ tiŋiizi tio kek.

⁷Nio aŋkamam mburoŋ se ki Yooba tau. Mi ni iwe siŋgiao pio. Nio aŋpase pini, mi ni iuluulu yo. Tana leleŋ ambai kat, mi aŋbo mboe. Ko aŋpakurkur zaana ma isala kor.