Kap 28:1-7

¹Dewit dakon kap kɨnda. Yawe, gak tɨp madepno, bɨsitno nandaŋek aŋpuluga. Dɨma aŋpulugoki kaŋ, nak amɨn kɨmakbi da tɨlak egɨpbeŋ.

²Bupmɨ nandaŋ namɨŋek aŋpulugoki do yaŋ tɨdokeŋ bɨsapmon nandaŋ nabi. Bɨsit aŋek kɨsitno paŋenokgo telagɨ yutgo da tet do wɨgɨsak.

³Yokwi pakpak amɨn gat kɨsi nak dɨma ɨlɨk paŋkɨ mabɨ kɨneŋ. Uŋun amɨn kwen da notni do gen galagɨ galagɨ yoŋ. Mani burɨgwan nandak nandakni yokwi morapmɨ toŋ.

⁴Aŋpak yokwi awit uŋun da arɨpmon kobogɨ do tepmɨ pi yobi. Amɨn do yokwi awit uŋun paŋtobɨlbɨ iyɨkon kɨni.

⁵Yawe da pi madepsi aŋek yo morap wasagɨt uŋun do dɨma nandaŋ. Yaŋdo, uŋun amɨn yut kɨnda naŋ yaŋ tuwɨlek dɨma awaldɨsak.

⁶Bupmɨ nandaŋ namjak do bɨsit abo bɨsitno kɨlɨ nandagɨt, do Yawe dakon man awɨgɨkeŋ.

⁷Yawe da tapmɨm namɨŋek pasɨkno asak. Yaŋ asak do aŋek nandaŋ gadaŋ ɨmɨsat. Yawe da nak aŋpulugosok uŋun do kɨsɨk kɨsɨk madepsi nandaŋ ɨmɨsat. Nak ya yaŋ iyɨŋek kap morapmɨ yosot.