GWAY GI IDAWUU’D 28:1-7

¹E /e mo tani, ayy Tap̱a, aha/ yuḵkina /e mo. /E jin ta wosh pem mo, dhalku/ ki ta a’diye/ gom aha/ mo, isi ciki/ waḵki/ /e mini ’taki c̱a’b ki shwamm gom aha/ mo tani aha/ mina e waki uni gwansan gun iin ka luŋgu’b e jisa ’kulga/ mo.

²Ciḵi ’twam pem jin oka/ gwo gom mo ma di’b is pem jin di’bka/ mo ma, me’d jin gwoka/ ’twa/ i /e gom mowoṯẖ mo, me’d jin ’de’kkika/ me’d pem ki mis mo ’kup̱ ki mom pini jin miinu to jin ḵogu mo jin bol tiya e mo.

³Dhalku/ ki nu’th aha/ ’ban nyaḵki imanmii tonthus mo, nyaḵki uni gwansan kun ta imanmii to kun ta thus ki thus mo, uni gun ṯorkina ṯor gom moŋḵu’th is nyaḵki imannyaḵ ’kom buni mo, ki mo ma pibi ’kokin eya dum buni mo.

⁴Raḵi uni to ibway isi ki tom buni kun miina uni mo, dhali isi ki tonthus buni kun miikina uni mo. Raḵi uni to ibway isi ki miin to kun miina uni ki me’d buni mo. Garki uni to ’kusi ’twa/ kun mina uni gam mo.

⁵Haali/ uni ’koki dhu miin to gi Tap̱a mo, walla miin to ki me’d piti mo. A’di midi ’ce’d uni ka ’cesh mo dhali midi diki nyaŋ uni ki mis doḵ/e mo.

⁶Mom’bor mii midi di gom Tap̱a mo! Haali/ a’di ciḵki ’twam pem goma di’b is jin di’bkika/ is mo.

⁷Tap̱a a’di ita mom’bi’th pem mo dhali agoŋgorom pem mo. E a’di mo tani adum pem gamki gwo is mo be. Wakan aha/ woṯẖkunu mo dhali adum pem midi ya i mis mo, dhali ki gway pem jin miga/ yuḵ mo tani aha/ mina c̱i a’di mo jin ’boruwa ’bor bwa i is mo.