SALMOS 22:5-12

⁵Mitznojnotzque quema taijyohuiyayaj huan tiquinmaquixti. Ipan ta motemachijque huan amo tiquinpinahualti.

⁶Pero na nimomati quej se pilocuiltzi huan amo nise masehuali. Sequij san nechhuetzquilíaj huan sequinoc nechcualancaitaj.

⁷Nochi cati nechitaj san noca paquij, huan nechhuihuiitaj huan motzonojoliníaj,

⁸huan quiijtohuaj: “Yaya motemachía ipan TOTECO, huajca ma tiquitaca sinta quimaquixtis. Sinta nelía quiicnelía, ma quimanahuiqui.” Quej nopa quiijtohuaj masehualme.

⁹Pero TOTECO, na nijmati para techpalehuijtoc. Techquixti iijtico nonana. Techmocuitahuijtoc hasta ten quema noja nichichiyaya.

¹⁰Huan quema nitacatqui ya ipa nimotemachijtoc ipan ta. Nochi tonali tieltihualajtoc tinoTeco Dios.

¹¹Amo techtalcahui san pampa hualajtoc ni tequipacholi huan amo aqui seyoc cati hueli nechpalehuis.

¹²Miyaqui nocualancaitacahua nechyahualojtoque quej torojme cati mosisiníaj. Quena, nesij quej nopa huejhueyi torojme cati itztoque ipan tali Basán.