SALMOS 132:11-16

¹¹Pampa ta, TOTECO, tijtajtolcahuili David, huan amo quema tiquelcahua tijtamichihuas cati tijtajtolcahua tijchihuas. Huan ta tiquilhui para teipa tiquintalis iixhuihua ipan isiyaj para tanahuatise.

¹²Huan sinta iixhuihua quichihuase cati quiijtohua nopa camanal sencahuali cati tijchijqui ica David huan sinta quitepanitase motajtol, huajca inijuanti nojquiya mosehuise ipan isiyaj para tanahuatise para nochipa.

¹³Pampa ta TOTECO, tijtapejpenijtoc altepet Jerusalén para tiitztos nopona.

¹⁴Tiquijto: “Ya ni elis nochaj campa niitztos para nochipa. Nopona nimocahuas pampa ya nopa cati nijnequi.

¹⁵Nijtiochihuas miyac ni altepet huan niquintamacas imasehualhua cati teicneltzitzi.

¹⁶Niquinmaquixtis itotajtzitzi ten nochi cati quinequij quincocose, huan itatzejtzeloltica masehualhua tzajtzise ica paquilisti.