Salmo 86:1-15

¹Apo, dengngem koma ya patgam nan kararag ko, tan kaseseg-angak ya magay bael ko.

²Diyos ay pantalkak, somalaknib ya omisalakan ka, tan napodnoak ay mansilbi en sik-a.

³Apo, maseg-ang ka koma, tan maninsin-agew ay mankararagak en sik-a.

⁴Paragsakem koma nan mansilsilbi en sik-a, tan di pankararagak et sik-a.

⁵Nakasagana ka ay mamakawan ya managseg-ang ka, adi manbalbaliw din layad mo sin mankararag en sik-a.

⁶Dengngem koma nan kararag ko ay mankedaw si badang mo.

⁷Mankararagak en sik-a sin timpon di ligat ko, tan patgam din kararag ko.

⁸Magay Diyos ay makaison sik-a, Apo, magay makaamag sin inam-amag mo.

⁹Amin ay nasyon ay insaad mo et omali dan to, mandokmog dan sik-a ay mangidayaw sin ngadan mo.

¹⁰Tan nangato ka, din amagem yan nakaskasdaaw da, magay odom ay Diyos mo adi et sik-a.

¹¹Itdom ay Diyos di pandanak ay kosto ta say napodnoak ay mamati en sik-a, Apo. Omiturong ka ta maimongsan di nemnem ko ay mangipateg sin ngadan mo.

¹²Naimposoan di pan-iyamanak en sik-a, Apo, idaydayaw kos sik-as eng-enggana, Yahweh ay Diyos ko.

¹³Tan din layad mon sak-en et palalo ay dakdake, et inmisalakan ka sin pese.

¹⁴Komonkontra din mankakekedse ya mangipapangatos awak da, ipogaw ay adi mangikaskason sik-a. Nantotolag da en pomse da.

¹⁵Ngem sik-a, Yahweh ay Diyos, et managseg-ang ka, naanos, managlayad ya napodno ka.