Mboe 86:1-15

¹Mboe ki Dabit O Yooba, ŋgun talŋom pio. Leŋ suŋŋana tio ti mi uulu yo. Pa iŋgi aŋbotmbot raama pataŋana mi aŋrru zaala.

²Nu ta Anutu tio. Mi nio mbesooŋo ku mi aŋpase pu. Tana poroukaala yo mi kamke yo: Kokena aŋmeete. Pa nio aŋurur leleŋ pu mi aŋtoto mbulu ku.

³Merere tio, muŋai yo lak! Pa aigule ta boozomen, zoŋ ise ma ila zoŋ isula na, aŋtaŋroro u.

⁴Merere, nio mbesooŋo ku. Uulu yo. Naso kam ma leleŋ ambai mi menmeen yo. Pa iŋgi suŋŋana tio imama ku raama leleŋ.

⁵Merere, nu ambaiŋom kat. Nu rekreege sanaana kizin tomtom, mi toto sua ku mbukŋana, mi urur kat lelem pa zin wal ta titaŋroro u na.

⁶O Yooba, ŋgun talŋom pa suŋŋana tio. Leŋ tiŋiizi tio ti mi muŋai yo. Pa nio mbesooŋo ku tau.

⁷Nio sombe pataŋana indeeŋe yo, nako aŋtaŋroro u. Pa nu leŋleŋ suŋŋana tio mi uluulu yo.

⁸Merere tio, nu itum tamen ta Anutu ŋonoono. Anutu toro sa kembei ta nu na som. Pa uraata ku ilip kat. Tana kadom sa som.

⁹Merere tio, nu ur tomtom ta munŋaana men ma timbot pa lele kizin kizin. Karkari ta boozomen ko timar be tilek kumbun pu mi tipakur zom.

¹⁰Pa nu ta biibi ŋonoono. Mi nu kamam uraata mburanŋan ta ipa ndel kat. Tana nu itum tamen ta Anutu ŋonoono.

¹¹O Yooba, paute yo pa zaala ku. Naso aŋpa pai tio ma indeeŋe men pa sua ku ŋonoono. Mi kam ma aŋur kat leleŋ pu. Naso aŋmototo u mi aŋleŋleŋ la kalŋom.

¹²Merere, nu Anutu tio. Nio ko leleŋ ambai pu mi aŋur kat leleŋ pu, mi aŋpakurkur zom ma alok.

¹³Pa nu toto sua ku mbukŋana mi urur kat lelem pio. Muŋgu aŋbot la naala kezeene. Tamen nu tatke yo pa pataŋana tana, tabe aŋmeete som.

¹⁴O Anutu, re. Iŋgi zin wal sananŋan timaŋga be tikam malmal pio mi tikoto yo. Wal zigzikŋan tilup zin, mi tisombe tipun yo ma aŋmeete. Wal tana timuŋai tomtom sa som, mi tikam ŋgar pu risa som.

¹⁵Tamen Merere, nu lelem izanzaana pizin mbesooŋo ku, mi muŋaiŋai zin mi kampewe zin. Mi ketem malmal karau som, mi toto sua ku mbukŋana mi urur kat lelem pa wal ku.