Pesalem 86:1-15

¹O Apômtau, mêŋwê taŋam to ôkêŋ taŋam aê gebe aê ŋac sawa gaŋgôŋ jageo.

²Ojop aêŋoc katuc gebe aê ôlic andaŋ aôm tec gamoa. O ŋoc Anôtô, ônam nêm sakiŋwaga, taŋ mata kêsap aôm naŋ sa.

³O Apômtau, ŋoc Anôtô, taêm walô aê gebe aoc gêjac aôm gedeŋ tôŋgeŋ.

⁴Ôkêŋ nêm sakiŋwaganê ŋalêlôm êtu samuc. O Apômtau, aê kasuŋ ŋoc ŋalêlôm sa gêdêŋ aôm.

⁵Gebe aôm Apômtau, kôtu ŋac gabêjam ma kôsuc biŋ ôkwi kêlêlêc. Aômnêm têmtac gêwiŋ teŋgeŋŋa gêdêŋ lau samob, taŋ aweŋ gêjac aôm naŋ.

⁶O Apômtau, ôŋô ŋoc mec. Wê taŋam ŋoc taŋiboa kapôêŋ.

⁷Embe japô lêna, oc aoc ênac aôm gebe aôm oc ôjô aêŋoc mec.

⁸O Apômtau, anôtôi nêŋ teŋ kêtôm aôm gêmoa atom. Ma gêŋ ŋanô teŋ oc êtôm gêŋ, taŋ aôm gôgôm naŋ, atom amboac tonaŋgeŋ.

⁹O Apômtau, lau samuc samob, taŋ kôkêŋ êsêac naŋ, oc mêŋsêpôŋ eŋduc êndêŋ aôm. Ma sêŋgôm nêm ŋaê ŋawae êsa.

¹⁰Gebe aôm taômgeŋ ŋac kapôêŋ tec gôgôm gêŋsêga. Biŋŋanô, aôm taômgeŋ tec kôtu Anôtô.

¹¹O Apômtau, ôndôŋ nêm lêŋ êndêŋ aê, go taŋoc wamu aôm ŋaŋêŋgeŋ. Ôndôŋ aê gebe janam sakiŋ aôm toŋoc ŋalêlôm samucgeŋ.

¹²O Apômtau ŋoc Anôtô, gabe aoc êôc aôm toŋoc ŋalêlôm samucgeŋ ma jaŋgôm nêm ŋaê ŋawae êsa endeŋ tôŋgeŋ.

¹³Gebe aôm têmtac gêwiŋ aê teŋgeŋ. Aôm kôjaŋgo katuc su aŋga lamboam ŋakêlêndiŋ.

¹⁴O Anôtô, lau teŋbeleŋ aŋgeŋ sêkêli tauŋ gêdêŋ aê ma ŋaclai totoŋgeŋ dêdib katuc sêmoa ma êsêac sêsa aôm laŋôm sa elêmê atom.

¹⁵O Apômtau, aôm Anôtô taêm labu to kômoasiŋ kêlêlêc. Aôm ŋac gabêjam tec gôê biŋ tôŋ ma nêm têmtac gêwiŋ teŋgeŋŋa gêc gedeŋ tôŋgeŋ.