Buk Song 86:1-15

¹Devit i raitim dispela beten. Bikpela, mi no gat strong na mi no inap helpim mi yet. Olsem na mi laik bai yu harim prea bilong mi na helpim mi.

²Kisim bek mi na mi no ken i dai, long wanem, mi save bihainim yu. Mi wokman bilong yu, na mi save bilip long yu, olsem na yu mas helpim mi.

³Yu yet yu God bilong mi. Plis, yu ken marimari long mi. Olgeta de long san na long nait, mi save beten long yu.

⁴Bikpela, givim amamas long bel bilong mi, wokman bilong yu. Long wanem, mi prea long yu tasol.

⁵Bikpela, yu gutpela tru na yu save rausim sin bilong mipela. Yu save laikim tumas olgeta manmeri i save beten long yu.

⁶Bikpela, yu mas putim gut yau long prea bilong mi. Mi singautim yu bilong helpim mi. Harim singaut bilong mi.

⁷Yu save helpim mi long taim mi singaut long yu. Olsem na olgeta taim mi karim hevi mi save beten long yu.

⁸Bikpela, i no gat wanpela god i olsem yu. Yu winim ol. Na i no gat wanpela man inap mekim wankain wok olsem yu save mekim.

⁹Olgeta lain manmeri yu bin wokim ol, bai ol i go brukim skru long yu, na bai ol i litimapim nem bilong yu.

¹⁰Long wanem, yu tasol yu gat bikpela strong. Na yu tasol yu save mekim ol kain kain gutpela gutpela samting. Yu wanpela tasol yu God tru.

¹¹Bikpela, yu mas skulim mi gut long pasin yu laik mi mekim, na oltaim bai mi bihainim laik bilong yu. Lainim mi gut bai mi tingting long yu wanpela tasol, na mi mekim wok bilong yu oltaim.

¹²God, Bikpela bilong mi, mi givim bikpela tenkyu long yu. Na mi laik litimapim biknem bilong yu oltaim oltaim.

¹³Oltaim yu save laikim mi tumas. Yu bin kisim bek mi long dai na mi no i go long ples bilong ol man i dai pinis.

¹⁴God, nau sampela bikhetman i kam na i laik pait long mi. Ol dispela man nogut ol i no save marimari liklik na ol i bung bilong kilim mi i dai. Ol i no save bihainim tok bilong yu. Ol i sakim yu tasol.

¹⁵Tasol Bikpela, sori na marimari i pulap long yu, na yu no save kros kwiktaim. Yu save laikim mipela tumas, na yu no save senisim tok bilong yu.