Salmo 83:2-18

²tan doy labanen daka sin mangililiget en sik-a.

³Nasikap da yan way lawa ay plano da sin ipogaw ay napateg en sik-a.

⁴Kanan da, “Omali kayo ta peslen tako amin daida ta malinglingan ed Israel si eng-enggana.”

⁵Nantotolag da ay manbabadang da ay manlaban en sik-a.

⁶Nantotolag din Edomita ya Ismaelita, Hagareno ya Moabita,

⁷din taga-Gebal, Ammonita ya Amalekita, din taga-Tiro ya Filistia.

⁸Naitapi aben daida din taga-Assyria ay napigsa ay kabadang din polin Lot ay Ammonita ya Moabita.

⁹Amagem koman daida din inyat mos taga-Midian ya da Sisera en Jabin sin ginawang ay Kison.

¹⁰Inabak mo ed Endor si daida et naboyok awak da sin lota.

¹¹Kaman din inyat mon da Oreb en Zeeb koma di amagem sin papangolo da. Abakem din tuturay da ay kaman din panangabak mon da Zeba en Zalmunna.

¹²Daida din nangwani en okaen da din okan Diyos ay daga.

¹³Iwalang mos daida ay kaman tapok, kaman teg-ap ay itayaw di dagem.

¹⁴Kaman koman din iyat di apoy sin kadondontogan ay mamoo sin kada,

¹⁵apayawem ya kibtotem daida babaen si dagem mo ay napigsa.

¹⁶Ibabain mos daida ta bigbigen da ay manakabalin ka.

¹⁷Maabak ya emegyat da komas eng-enggana ya palalo koma ay maibabain da sin kateyan da.

¹⁸Siya na di ammoen da koma: sik-a anggoy ay Yahweh di ngadana din kangatoan ay mangituray sin daga.