Text copied!
CopyCompare
Maaron Saveeŋ Toni Patabuaŋ - Mbouŋ to Yes Israela - Mbouŋ to Yes Israela 83

Mbouŋ to Yes Israela 83:2-18

Help us?
Click on verse(s) to share them!
2Ughita. Koiamŋa tighaze tipamundigin malmal. Yes to tighur koi payom, tipakur taudi, ve tighamgham aghedi payom.
3Tamtoghon tiom to lolom padi kat, koiamŋa tonowen tilup di, ve tikaal ataam pa tiwaghamun di.
4Tighaze: “Anim tala ve tapasob yes Israela le tisob kat. Leso ledi izadi muul sob, ve tamtoghon lolodi imaagh padi.”
5Onoon kat, koiamŋa tonowen tilup lolodi ve ŋgar todi inim ee moghon, ve timbua saveeŋ tighaze tizoor pooz tiom, ve tiwaghamun tamtoghon tiom. Yes tamtoghon to ndug tonene:
6Yes Edoma ve Ismael papaghu toni, ve yes Moapa ve yes Agri,
7ve yes to taan suruvu to Gebal toman yes Amona ve Amaleka, ve yes Pilistia ve tamtoghon to ndug Tiro.
8Ve yes Asiria paam to ndiran ariaŋadi to malmal, tivool to yes Amona ve Moapa to Lot papaghu toni, leso tiuul di pa malmal.
9Tovenen yei nitaŋ roran ghom nighaze ugham ŋgar raraate pa yes ndiran tonowen inimale muuŋ ugham pa yes Midiana, ve muri ugham pa Sisera yesuru Yabin izi ya Kison.
10Sawa tonenen, yom urab di timatmaat izi ndug Endor, ve patudi tiwaghengheen ila taan ve timbuuz.
11Yes daba to koiamai, ugham ŋgar raraate padi inimale muuŋ ugham pa Oreb yesuru Zeeb. Ve yes pooza todi tovene paam. Utatan di inimale muuŋ utatan Zeba yesuru Zalmuna.
12Ndiran ru tonowen, muuŋ tisaav tighaze: “Maaron taan toni, le kikiliiŋ popoia. Tala taghami inim leed.”
13Maaron tiou, ureu di le timbiriis tinimale ghavuur ve buzbuz to yaghur iviviira gha ilale.
14Uwaghamun di inimale yab ighan suvun reg, ve inimale yab ighan izala lolooz, le ipasob su.
15Ugham uman tiina izi, ve yaghur tiina imundig, leso timatughez ve tighau.
16O Yoova, utatan di. Leso mayadi kat, ve tighilaal tighaze yom izam tiina, ve tisuŋ payom.
17Ugham di tiwaghamgham, ve tineep toman mayadi itaghoni taghoni gha ila. Upamayaŋin di, ve upasob di.
18Leso tighilaal tighaze: Yoova, yom moghon to izam tiina. Yom Maaron Tiina To Ulib Pa Ndimaronŋa Tisob, ve uŋgin taan isob.

Read Mbouŋ to Yes Israela 83Mbouŋ to Yes Israela 83
Compare Mbouŋ to Yes Israela 83:2-18Mbouŋ to Yes Israela 83:2-18