Salmo 77:2-19

²Nankarakararagak en sik-a isnan timpon di ligat ko. Naninsinlabi ay intatag-ay kon takkay ko ay mankararag en sik-a, Apo, ngem magay makaliwliwa sin nemnem ko.

³Mo nemnemek sik-a, “Ay apaw na,” kanak, tan dadlonak nadismaya.

⁴Gapon sik-a, adiak makaseyep ay naninsinlabi, palalo ay nariribokanak et adiak makakali.

⁵Din agew ya tawen ay nalabas yan manemnem ko,

⁶maninsinlabi ay ad-adoy salodsod ko:

⁷“Ay domokog si Diyos si eng-enggana? Ay adi na ipaila kasin en sak-en din seg-ang na?

⁸Ay enggay napap-eng din adi manbalbaliw ay layad na? Ay polos ay adi matongpal din kari na?

⁹Ay enggay magay seg-ang na? Ay insaldeng na begew sin bonget na?”

¹⁰Pagak kanan, “Siya nay pansakitan di nemnem ko, din panakabalin Diyos ay Kangatoan yan baken kaman sin damo.”

¹¹Nemnemek din nakaskasdaaw ay inam-amag mod idi, Apo.

¹²Nemnemek amin din kaeegyat ay inamag mo.

¹³Nasantoan amin ay inamag mo, sik-a ay Diyos mi yan magay makaiso.

¹⁴Sik-a din Diyos ay makaamag si milagro, inpailam sin nanasyon din panakabalin mo.

¹⁵Insalakan mo babaen sin panakabalin mo din polin da Jacob en Jose ay ipogaw mo.

¹⁶Inmegyat din danom idi inila nas sik-a, olay din malosong ay baybay, nanpayegpeg si egyat na.

¹⁷Din odan, inig-as din liboo nankido ed kayang yan nankimat sin amin ay disso.

¹⁸Din kidom yan man-agodood da, nasilawan din lobong sin kimat na, naikiweg ya nanpayegpeg din daga.

¹⁹Nandan ka sin danom, Apo, din baybay yan binalasat mo, ngem adi maila din gatin mo.