Mbouŋ To Yes Israela 77:2-19

²Saawe tau naleep ila pataŋani tiina loolo, yau nazuari ghau naghe le nagham uleeŋ ila to Maaron. Mboŋ ve mataaz, naitiit nimag izaa, ve nasuŋsuŋ pani. Irau namariau mako. Eemon gabua eta irau irav ateg mako.

³Yau matag iŋgalŋgal Maaron, ve lolog isaghat ve nataŋ. Naghamgham ŋgar naol. Tauta lolog ipataŋan ve tapirig isov.

⁴Mboŋ ta naol ne, Maaron ipul ghau nagheen poi mako. Lolog ipataŋan kat le irau nasavia saveeŋ eta mako. Naneneeŋ mon.

⁵Pasaa, matag iŋgal imuul ila pa ndaman katini tau ila wa. Ve naŋuzuuv ŋgar tau muuŋ Maaron ighamgham pa tamtamon tooni.

⁶Tauvene mboŋ ta naol ne, nagham ŋgar tiina ila lolog, ve matag iŋgalŋgal naghe:

⁷“Mindai, pale Maaron ighur muuri payei, ve ipul ghei nileep saghat taghon taghon gha ila? Irau loolo poia payei muul mako?

⁸Ŋgar to loolo isaghav tamtamon tooni ve iuluul zi, ene isov wa? Ve saveeŋ katini tau i imbua tomani ghei na, pale izi imin kaut sorok taghon taghon gha ila?

⁹Ma Maaron aate yavyav kat, le ighamu loolo iveghai poia tooni? Tauta loolo isaghatin ghei muul mako ne?”

¹⁰Nagham ŋgar tauvene, tauta nasaav pa taug naghe: “Lolog ipataŋan kat pasaa, Maaron tau ileep saaŋa le saaŋa kat na, itoor ŋgar tooni wa. Taghita tapiri ilam ilam le aazne, taghita muul mako.”

¹¹Yoova, yau aat matag iŋgal imuul ila pa uraat tsio tintiina, ve gabua ŋgeretazi tau muuŋ ughamgham zi na.

¹²Yau aat matag iŋgal uraat tsio ariaŋazi ta naol ne, ve nagham ŋgar pazi poi.

¹³O Maaron, yo ughamgham ŋgar patabuyaaŋ mon. Ŋgar tsio ve gabuam, ene maata ite kat. Maaron ite paam eeza tiina imin yo ne mako.

¹⁴Yo Maaron tau ughamgham gabua ŋgeretazi tintiina. Utotoi tapirim ivot ighazooŋ ila nugh nugh matazi gha tighit katini wa.

¹⁵Yakop ve Yosep paaghu toozi, ene tamtamon tsio. Muuŋ, ila taum tapirim, yo upas yes Israela tivot pa pataŋani toozi wa.

¹⁶O Maaron, saawe tau yaa tintiina tighit ghom, roiŋ tiina igham zi. Ve te tau igheen izila siiŋa we, iroi paam, ve imbelmbeluut ghi ilala ilamlam.

¹⁷Saawe tana, taitai gabgabuuŋ ve uman tiina izi. Ve lalaav lutluutu tiina, ve ighani milmilia ilala ilamlam.

¹⁸Yo ugham yaghur tiini ililiit, ve lalaav lutluutu tiina kat. Ve nugh ighani milia, ve mbonari isul nugh. Ve yogyoog itok taan gha ilala ilamlam.

¹⁹Eez tsio imbut te ve ila pa ziige ite. Yo uvalagh mazavan, le sirivu ila pa ŋas, ve sirivu ila pa tapir, ve ulaagh ila bodbodaaŋ. Eemon tighita aghem niia mako.