Iba Gana 77:2-19

²Genda anda ibirangi i̱na Anduane Homogohondo bi laruli. Mbiraga bibahendengi i̱na gi yaraga halu Anduane Homogohondo bi laruligoyu i̱ha mo palia holene nawi dege kogoni.

³I̱na Ngode Datagaliwabe mitangi biaabo halu koria i̱naga bu miniha dugu bialu haruli. I̱na mitangitangi bialu mini hurula bialu kogola i̱naga miniha genda dege dindi ho haruli.

⁴Ibugua i̱ palia hondo nahe mo yangayangabu helaga kagoni. I̱naga bu miniha genda yu kogome bi labe naheore kogoni.

⁵Ainde i̱ni bamba bayale hama ibiniru mitangibu dai bialu haruli. Mali ala bolangua halu peneru mitangiore bialu haruli.

⁶Mbiraga paluwa i̱na mitangitangi dege biruli. I̱naga miniha mini hurula bu howa i̱nihondo bi ogobi laruli,

⁷Anduane Homogohanda inahondo erembira ngialu haabo holebiradabe. Inahondo turu lone naholobadabe.

⁸Ibugua ina dara howa gubalini haraligo hairi áyu kagonidabe. Ibugua buleore lalu bi lo wiyaru habo layadabe.

⁹Ngode Datagaliwabehanda ina dara howa biamogo bulene embeda hayabe tobaheda. Ibunaga dara holene winigo ai keba holene wia aribia hayadabe, lo mitangi bu harugoni.

¹⁰I̱na urunidagua mitangibu howa lalu, Ngode Datagaliwabe Daligaorene Daliga kago ibugua ina áyu pele ngulenego manga hayada. Ibu ogonibi haruada mitangi bialu i̱naga bu miniha tandaga timbuniore ho kogoni ndobe, larugoni.

¹¹Anduane Homogo-o biabe timbuni í̠na biriruni mitangibu dai bulebero. Bambaore í̠na mbirale tara nahendene ale bigi biriru mitangi budai bulebero.

¹²Biabe bibahendeore í̠na biriru damene mitangi biaiore holebero. Í̠na biabe hongohe taraore bigi biriruni mitangi biai holebero.

¹³Ngode Datagaliwabe-o í̠na bigi biriligo bibahende bayale tigabiore birili. Mbirale bi pupu wule dama mitangi bialu gime wabini ngaruni bibahendeore í̠ ale mbira nawiore. Í̠na uruni bolangua haihe kegoni.

¹⁴Ngode Datagaliwabe-o mbirale nahendene ale agalime bibe nahe ngaru biai haga í̠ni hanguore kegoni. Bamba í̠na wali agali dindi tara tarani bu hearuhondo í̠ninaga hongo timbuni walia harigoni.

¹⁵Yagaba Yosebelanaga aguanene í̠ninaga wali agali mani andaho aribia hene hearu í̠ninaga hongooreme pele mialu haru dai birigoni.

¹⁶Ngode Datagaliwabe-o bamba iba berearume í̠ hondowa gi hai haya. Iba solowara timbuni berearumebi duru lalu biraya.

¹⁷Beralibame iba dalu timbuniore ibira halu hari kilikulu timbuniore layuagobi hari daba migimege laga bialubi uruni bibahende biai haya.

¹⁸Humbirini wai biyago dombeneha howa hari kilikulu timbuni lelarigoni. Hari daba migimege lelarigome dindi bibahendeha wá hagimbu biyagola dindi ogo mogo lalu dumbirumbi biagimbu biya.

¹⁹Iba yaribu biyagoria í̠ni iba daligani pirigoni. Iba solowara timbuni bereagoha hariga bo wialu pirigoni. Í̠ penegoha ge ngane nahandabeheya.