Salmo 76:2-8

²Ed Zion ay sakop di Jerusalem di panteana.

³Isdi yan ginotlo na din panan di kalabana. Dinadael na din kasay ya kampilan da, dinadael na amin ay armas da.

⁴Nakaskasdaaw di koniniing mo, Apo! Nangatngato ka mo din dontog ay nangabakam si kalaban mo.

⁵Nakoskosan di nankatotoled ay soldado da sin armas ya odom ay sanikwa da. Kaman dan naseseyep, tan enggay natey da, magay silbin di bikas ya laing da.

⁶Diyos ay dinaydayaw Jacob, idi niyamyamam daida, natokang da pati din kabayo da.

⁷Palalo ay napateg ya maegyatan ka, magay makaitoled ay somango en sik-a mo bomonget ka.

⁸Ed langit, pinmika ka ta ikeddeng moy sentensiya, et ginmiginek amin ay wada sin daga si egyat da, sin nangokomam en daida ta maisalakan amin ay mapalpaligat isnan daga.