1ܦܲܨܝܼ ܠܝܼ ܡ̣ܢ ܕܸܫ̃ܡܸܢܝܼ̈، ܝܵܐ ܐܲܠܵܗܝܼ، ܡܲܪܡܹܝܬ ܠܝܼ ܪܸܚܩܵܐ ܠܥܸܠܔ ܡ̣ܢ ܩܵܝܡܵܢܹ̈ܐ ܕܥܲܠܝܼ.
2ܦܲܨܝܼ ܠܝܼ ܡ̣ܢ ܦܵܠܚܵܢܹ̈ܐ ܕܥܵܘܠܵܐ، ܘܦܲܪܸܩ ܠܝܼ ܡ̣ܢ ܫܲܦܟ݂ܵܢܹ̈ܐ ܕܕܸܡܵܐ.
3ܣܵܒܵܒ ܗܵܐ، ܝܬܝܼܒ݂ ܠܗܘܿܢ ܒܟܡܹܐܢܵܐ ܠܓܵܢܝܼ، ܓ̰ܡܝܼܥ ܠܗܘܿܢ ܥܲܠܝܼ ܙܲܪ̈ܒܵܢܹܐ، ܐܵܦܸܢ ܕܠܹܐ ܝܘܸܢ ܥܒ݂ܝܼܕܵܐ ܓܢܵܗܵܐ ܐܵܦܠܵܐ ܚܛܝܼܬܵܐ، ܝܵܐ ܡܵܪܝܵܐ.
4ܟܲܕ ܠܵܐ ܥܒ݂ܝܼܕܵܐ ܥܵܘܠܵܐ، ܟܹܐ ܪܵܚܛܝܼ ܘܗܲܕܪܝܼ ܓܵܢܵܝܗܝ، ܬܥܘܿܪ ܠܸܬܦܵܩܵܐ ܒܝܼܝܼ، ܘܚܙܝܼ.
5ܘܐܲܢ݇ܬ، ܝܵܐ ܡܵܪܝܵܐ ܐܲܠܵܗܵܐ ܚܲܝܠܬܵܢܵܐ، ܐܲܠܵܗܵܐ ܕܐܝܼܣܪܵܐܹܝܠܔ، ܪܥܘܿܫ ܠܸܦܪܵܥܵܐ ܠܟܠܵܝܗܝ ܐܸܡܘܵܬܹ̈ܐ، ܠܵܐ ܪܵܚܡܹܬ ܠܗܸܟ̃ ܥܵܘܵܠܵܐ ܠܵܐ ܡܗܘܼܡܢܵܐ. ܣܹܠܵܗ
6ܟܹܐ ܕܵܝܪܝܼ ܒܪܲܡܫܵܐ ܙܵܘܙܝܼ ܐܲܝܟ݂ ܟܲܠܒܹ̈ܐ، ܘܚܵܕܪܝܼ ܚܵܕܸܪ̈ܘܵܢܹܐ ܕܡܕܝܼܢ݇ܬܵܐ.
7ܗܵܐ، ܟܹܐ ܓܲܒܓܸܒܝܼ ܠܹܗ ܦܘܼܡܵܝܗܝ ܒܡܹܐܡܪܹ̈ܐ، ܕܝܼܢܵܐ ܣܲܝܦܹ̈ܐ ܒܣܸܦܘܵܬܵܝ̈ܗܝ، ܣܵܒܵܒ ܟܹܐ ܐܵܡܪܝܼ: ”ܡܵܢܝܼ ܝܠܹܗ ܒܸܫܡܵܥܵܐ؟“
8ܐܝܼܢܵܐ ܐܲܢ݇ܬ، ܝܵܐ ܡܵܪܝܵܐ، ܒܸܬ ܓܵܚܟܹܬ ܒܝܼܵܝܗܝ، ܒܸܬ ܡܲܣܚܸܪܸܬ ܒܟܠܵܝܗܝ ܐܸܡܘܵܬܹ̈ܐ.
9ܝܵܐ ܚܲܝܠܝܼ، ܐܸܠܘܼܟ݂ ܒܸܬ ܣܵܦܪܹܢ، ܣܵܒܵܒ ܐܲܠܵܗܵܐ ܝܠܹܗ ܒܹܝܬ ܓܵܘܣܝܼ.
10ܐܲܠܵܗܵܐ ܕܛܲܝܒܘܼܬܝܼ ܒܸܬ ܬܵܦܹܩ ܒܝܼܝܼ، ܐܲܠܵܗܵܐ ܒܸܬ ܡܲܚܙܹܐ ܠܝܼ ܙܵܟ݂ܘܼܬܵܐ ܠܕܸܫ̃ܡܸܢܝܼ̈.
11ܠܵܐ ܩܵܛܠܹܬ ܠܗܘܿܢ ܕܠܵܐ ܗܵܘܹܐ ܕܥܲܡܝܼ ܢܵܫܝܼ، ܡܲܫܥܸܫ ܠܗܘܿܢ ܒܚܲܝܠܘܼܟ݂، ܘܡܲܢܦܸܠܔ ܠܗܘܿܢ، ܝܵܐ ܡܵܪܝܵܐ ܡܵܛܵܠܲܢ.
12ܒܘܼܬ ܚܛܝܼܬܵܐ ܕܦܘܼܡܵܝܗܝ، ܗܹܡܸܙܡܵܢ ܕܣܸܦܘܵܬܵܝ̈ܗܝ، ܦܵܝܫܝܼ ܕܒ݂ܝܼܩܹܐ ܒܫܘܼܒ݂ܗܵܪܵܝܗܝ، ܘܒܘܼܬ ܠܵܘܛܬܵܐ ܘܕܲܓܵܠܘܼܬܵܐ ܕܟܹܐ ܗܲܩܝܼ.
13ܛܲܠܸܩ ܠܗܘܿܢ ܒܚܸܡܬܵܐ، ܛܲܠܸܩ ܠܗܘܿܢ ܕܠܵܐ ܦܵܝܫܝܼ، ܕܝܵܕܥܝܼ ܐܲܠܵܗܵܐ ܒܸܥܒ݂ܵܕܵܐ ܝܠܹܗ ܫܘܼܠܛܵܢܵܐ ܥܲܠܔ ܝܲܥܩܘܿܒ݂، ܗܲܠܔ ܡܲܪ̈ܙܵܢܹܐ ܕܐܲܪܥܵܐ. ܣܹܠܵܗ
14ܟܹܐ ܕܵܝܪܝܼ ܒܪܲܡܫܵܐ ܙܵܘܙܝܼ ܐܲܝܟ݂ ܟܲܠܒܹ̈ܐ، ܘܚܵܕܪܝܼ ܚܵܕܸܪ̈ܘܵܢܹܐ ܕܡܕܝܼܢ݇ܬܵܐ.
15ܐܵܢܝܼ ܟܹܐ ܚܵܕܪܝܼ ܒܵܬܪ ܡܹܐܟ݂ܘܼܠܬܵܐ، ܐܸܢ ܠܵܐ ܣܵܒ݂ܥܝܼ ܟܹܐ ܡܲܪܡܸܪܝܼ.
16ܐܝܼܢܵܐ ܐܵܢܵܐ، ܒܸܬ ܙܵܡܪܹܢ ܒܘܼܬ ܚܲܝܠܘܼܟ݂، ܘܒܸܬ ܫܲܒܚܸܢ ܒܨܲܦܪܵܐ ܒܘܼܬ ܛܲܝܒܘܼܬܘܼܟ݂، ܣܵܒܵܒ ܗܘܹܐ ܠܘܼܟ݂ ܒܹܝܬ ܓܵܘܣܵܐ ܩܵܬܝܼ، ܘܚܸܣܢܵܐ ܒܝܵܘܡܵܐ ܕܥܵܘܩܵܢܝܼ.
17ܝܵܐ ܚܲܝܠܝܼ، ܐܸܠܘܼܟ݂ ܒܸܬ ܙܵܡܪܹܢ، ܣܵܒܵܒ ܐܲܠܵܗܵܐ ܒܹܝܬ ܓܵܘܣܝܼ ܝܠܹܗ، ܐܲܠܵܗܵܐ ܕܛܲܝܒܘܼܬܝܼ.
