1Egu Dirava e, lau idia hadikaia gwauraia taudia dekena amo lau do oi hamauria. Lau dekenai idia tuari henia noho taudia dekena amo, lau do oi gimaia.
2Kara dika taudia dekena amo lau do oi hamauria. Ala-ala taudia dekena amo lau do oi durua, do lau mauri noho.
3Oi itaia, idia be lau alaia totona idia hunia noho. Dagedage taudia be lau hadikaia totona idia haboua noho.
4To Lohiabada e, inai be lauegu kara dika o lauegu kerere dainai lasi. Lau be mai egu kerere ta lasi, to idia heau mai, bona lau alaia totona idia hegaegae noho. Do oi noga, lau durua totona do oi mai. Lau do oi itaia!
5Lohiabada, Siahu Ibounai Dirava, Israela ena Dirava, mani do oi toreisi, bona Dirava idia ura lasi taudia edia dika davana do oi henia. Kara dika karaia totona, hunia dekenai idia laloa hebou taudia, be do oi alaia mase, do oi bogahisihisi henidia lasi.
6Adorahi ibounai idia giroa mai noho, bona sisia bamona idia boiboi noho, hanua lalonai idia raka loaloa neganai.
7Edia uduna dekena amo hereva dika, bona hereva badu idia mai, mumuta bamona. Edia malana be tuari kaia bamona. To idia laloa, idia gwau, “Daika ese ai dekenai ia kamonai diba?”
8To Lohiabada e, oi ese idia dekenai oi kiri noho. Oi ese Dirava ura lasi taudia ibounai dekenai, oi kirikirilaia noho.
9Lohiabada e, oiemu goada dainai oi dekenai lau abidadama henia noho. Oi be lauegu kohoro, egu hunia gabuna.
10Egu Dirava ese lau ia lalokau henia noho, bona ia be egu vairana dekenai do ia lao, lau dekenai idia tuari henia taudia ia ese do ia halusia.
11To Lohiabada e, unai lau idia hadikaia gwauraia taudia be do oi alaia lasi, egu bese taudia ese, unai taudia edia matakani do idia laloaboio garina. Mani emu kara oiemu siahu bada dekena amo idia do oi lulua, vadaeni do idia loaloa kava lao, bona do oi hadikadia. Lohiabada e, oi be aiemai gima Tauna, aiemai kesi.
12Edia ududia be dika, edia hereva ibounai be mai kara dika danu. Unai dainai Lohiabada e, sibodia edia hekokoroku dekena amo do oi hadikadia. Badina be idia ese, taunimanima hamasea hereva bona koikoi hereva idia gwauraia noho.
13Oiemu badu dekena amo do oi hadikadia ore. Do oi hadikadia ela bona idia boio momokani. Unai dekena amo, taunimanima do idia diba Dirava ese Israela ia biagua noho. Bona do idia diba danu, Dirava be tanobada ibounai ena biaguna badana.
14Lau idia hadikaia gwauraia taudia, be adorahi neganai idia giroa mai noho, sisia bamona idia boiboi noho, hanua lalonai idia raka loaloa neganai.
15Idia be sisia bamona aniani idia tahua loaloa, bona bema idia davaria lasi neganai, idia boiboi mai badu danu.
16To lau ese ane dekena amo, oiemu goada do lau hanamoa. Daba ibounai, ane dekena amo, oiemu noho hanaihanai lalokauna do lau hanamoa, badina oi be lauegu kohoro, bona egu heau mauri gabuna, nega dika ia vara neganai.
17Lohiabada e, oi sibona be egu goada ena badina. Oi hanamoa totona ane do lau abia. Oi Dirava be egu kohoro. Oi be lau oi lalokau henia noho Diravana.
