1Maaron tiou, uul ghou ve upas ghou ila koiagŋa nimadi. Ughur ghou naza sala, ve matam payou. Leso koiagŋa tiwaghamun ghou sob.
2Ugham mulin ghou, ve upas ghou ila ndiran samsamia tonene nimadi. Pasa, yes ndiran to malmal.
3Maaron, ughita! Yes to tapiridi tintina, tilup di ve tigham lilin ghou tighaze tirab ghou namaat. Yes lolodi isamin tamtoghon maau. Ve you leg sosor eta maau. Nazoor saveeŋ eta maau, ve nagham ŋgar samia eta maau. Eemoghon aazne, tigharaat taudi tighaze tigham malmal payou. Maaron, umundig uvool tiou, ve ughita di!
5Yoova, yom Maaron ariaŋam kat, ve uŋgin mbeb tisob. Yom moghon to Maaron to Israel. Yes ndug ndug to aazne tighur koi payou ne, muuŋ lupuuŋ tiei ee moghon. Ve aazne, tighur koi payou. Umundig ve ughur atia padi. Ughurghur di malep! Pasa, yes ndiran samsamiadi, ve avodi kaarom.
6Rabrab to naol ne, koiagŋa tinimnim, ve tilaghlaagh ila ndug lolo. Tiŋaaŋ mareer, ve lolodi ŋurŋuria tinimale ŋgavuun to ighaze ighan tamtoghon.
7Ughita. Saveeŋ samsamia moghon to ivotvot ila avodi. Yamadi, nene inimale buza mata. Ve tisavsaav tighaze: “Sei pale ilooŋ ghei?”
8Eemoghon Yoova, yom ughita di, ve uŋiŋ padi. Yes ndug ndug to tiwatag ghom maau, yom uveleg di, ve ughaze tirau sa?
9Maaron, you naghamgham tapirig ilat tiom. Tovenen naghur matag payom, ve nasasaŋan moghon. Koiagŋa irau tigham mbeb eta payou maau. Pasa, yom upoon ghou padi unumale raŋ to izala kat.
10Maaron tiou, lolom ineep tuŋia ila to tamtoghon tiom ve uluul di. Yom pale unum toman ghou, ve utatan koiagŋa, ve naghita pa taug matag.
11Eemoghon urab di timaat rikia malep. Upul di tineep toman pataŋani ris o. Leso tamtoghon tiou matadi kisin ŋgar tiom to ughurghur atia pa ndiran samsamiadi. Maaron, yom unum sigeu payei. Utatan di pa tapirim le tiwaghamgham, ve ureu mbirisan di.
12Pasa, saveeŋ to ivotvot ila avodi, poia maau. Moghon moghon avodi isosor. Yes tighamgham kaarom pa tamtoghon, ve tipipiyaav saveeŋ samsamia naol padi. Eemoghon ŋgar todi to tipapait taudi ve tiveleg ghom, nene pale inim liis padi.
13Tovenen upatooŋ mbalmbali tiom padi, ve uwaghamun di. Maaron, upasob di le tisob kat. Leso tamtoghon irau taan dige to naol ne, tighilaal ghom tighaze yom ughamgham pooz pa yei to Yakop papaghu toni ne.
14Rabrab to naol ne, koiagŋa tinimnim, ve tilaghlaagh ila ndug lolo. Tiŋaaŋ mareer, ve lolodi ŋurŋuria tinimale ŋgavuun to ighaze ighan tamtoghon.
15Yes tinimale ŋgavuun to tilaghlaagh ve tikalkaal aniiŋ. Ve ighaze tighan iraua maau, nene pale tinoknok taŋiiz.
16Eemoghon you pale nambou, ve napait izam pa tapirim tiina. Mboŋmaagh to naol ne, you pale nambou ve napait ghom pa ŋgar tiom to lolom ineep tuŋia ila to tamtoghon tiom ve uluul di. Pasa, yom uponpoon ghou unumale raŋ to izala kat. Ighaze pataŋani ivot payou, yom pale unum didiiŋ ariaŋa payou, leso nayooŋ ila.
17Maaron, you naghamgham tapirig ilat tiom. Tovenen nambou ve napait izam. Maaron tiou, yom uponpoon ghou unumale raŋ to izala kat. Ve lolom ineep tiou, ve uluul ghou irau sawa isob.
