Salmo 45:3-16

³Isiklang mo san kampilan mo, ari ay kapigsaan, madaydayaw ka tan sik-a di kangatoan.

⁴Mo en ka makigobat, sin panakabalin mo pangabakem di tet-ewa, salaknibam abe din waday kalintegana. Begew sin pigsam, kanayon ay mangab-abak ka!

⁵Din panam et matadem da, din poson di kaibaw mo et losoken da, ad-ado ay nasyon di somoko en sik-a.

⁶Din panturayam ay Diyos et magay pap-eng na. Iturayam din ipogaw mo et nalinteg di iyat mon daida.

⁷Laylaydem din siged ya kalkaliget mo din lawa. Isonga si Apo ay Diyos mo et sik-a di pinili na. Din ragsak ay indawat na en sik-a et ad-ado mo din ragsak di gagait mo.

⁸San badom et manseng-ew dadlo, tan napay-an si nankinalasi ay bangbanglo. Gan-ganasem din kotingting di arpa sin oneg di palasyo ay nabanol di arkos na.

⁹Din babbabai sin palasyom et madaydayaw da ay prinsesa. Din wada abe si makannawan mo et din nangato ay reyna. Kabanolan ay balitok di naialti sin awak na.

¹⁰Dengngem san ibagak en sik-a ay ikasal di ari. Linglingam et din ogalin di kakailiam ay wadas addawi,

¹¹tan begew sin kinapintas mo maawis en sik-a. Sisya et di apom, isonga tongpalem sisya.

¹²Din babaknang ed Tiro et isagotan das sik-a, tan kasapolan da di tolong mo en daida.

¹³Peteg di pintas din reyna ay makiasawa, naidait di balitok sin bado na.

¹⁴Maptemapteng din bado na idi maitlod sin kad-an di ari ay on-onoden din abay na ay babbabai.

¹⁵Peteg abe ay maragsakan da idi sin palasyo di senggepan da.

¹⁶Sik-a abe ay ari, man-ipotot kan to si ad-ado ay lalaki. Tadonen da din aap-om ay aari ed idi, tan din an-ak mo abe yan ari di kaisaadan da, panturayem daida isnan intiro ay daga.