Yaburina 45:3-16

³I tofan adamadiine birin xa, i fatan fala ɲaxumɛn tiyɛ, bayo Ala i barakama nɛn habadan!

⁴I ya silanfanna sɔti i dɛxɔn, sɛnbɛmana. Xunnayerenna nun binyena i tan nan xa!

⁵Siga soon fari xunnayerenni, i sa nɔɔn ti ɲɔndin nun yɛtɛ magodon nun tinxinyana fe ra. I fangan xa fe magaxuxine makɛnɛn!

⁶I ya xalimakuli ralemunxine xa i yaxune bɔɲɛne yisɔxɔn. Siyane birama nɛn i sanne bun.

⁷Ala, i luma nɛn i ya mangaya gbɛdɛni habadan! I ya mangaya taxamasenna nan tinxinyaan na.

⁸Tinxinna nan nafan i ma. A ɲaxin mi rafan i ma. Na nan a toxi Ala, i ya Ala bata i sugandi. A mɔn bata i ya sɛwan fari sa dangu bonne ra.

⁹Latikɔnɔnna nun se xiri ɲaxumɛne i ya dugine yi. Maxa se maxane i rasumunma mangane banxine yi naxanye maxidixi sama ɲinne ra.

¹⁰Mangane dii tɛmɛne ɲaxalandi tiine yɛ. I ya batɛn tixi i ya mangaya gbɛdɛn yii fari fɔxɔni. A maxidi seene rafalaxi xɛma faɲin nan na.

¹¹Mangana ɲaxalandina, i tuli mati n ma falan na. Ɲinan i kon kaane nun i bari bodene xɔn ma.

¹²I xɔnla bata mangan suxu i ya tofanna fe ra. I ya kuntigin na a ra, i xa a binya.

¹³Tire kaane fama kiseene ra i xa nɛn. Nafulu kanne i ya fanna fenma nɛn.

¹⁴Binyen birin mangana dii tɛmɛn xa mangayani. A doma gbeen nafalaxi xɛma dugin nan na.

¹⁵E nun a doma rayabuxin nan sigan mangan fɛma ɲaxalandi tiine biraxi a fɔxɔ ra a tideni.

¹⁶E so mangana genla ma sɛwan nun ɲaxan nin.