Legic 45:3-16

³Kuc miŋina gi, souga ʒikina hénaga kembaŋaiguc hiŋgaru, ic kewuac asac mararaŋ ʒéma qac buŋa séwi usu ésécnec héina.

⁴Ic kewu gi, ac héla ʒéma gum bénʒénʒéŋ ʒéma haka solaŋawac wamma edamugaguc becosic qahaiguc tacma kemma yaréiguc onogicbésémaŋ. Guac méra héiganéŋ gi haka welic welicgia kugémmac.

⁵Ic kewu, guac ʒakoŋganéŋ ʒéra qizilic, guac haʒéchécga ionac wéiwécgina néʒéŋgéma keremmac. Ic embac momac yanda guac wéségaiguc simiŋ héigémmu.

⁶Anutu guac tatacga edamuyaguc imi hémbénaŋa, baec héŋgaleŋ wawaŋawac ic kewu ɋarucganéŋ héna ac dindiŋanec meselimac.

⁷Gi imi haka solaŋawac siŋa nimma haka biriawac méʒéga tianʒac. Imuac Anutu, ic kewu guac Anutunéŋ ʒézé ségiségiac halécnéŋ météré gémma guac qocgégémma meyac géŋu alahécga onogicʒaŋ.

⁸Guac séwi usuga imi mocʒoŋ hémbénaŋa guac hiabia, ʒiniŋ kiʒubera saŋkara imuac héméŋa héimimia waŋu elefante yaŋac ʒuŋanéŋ memeya guac ama kewuya igucnec gita kulele qacma mehiaru géŋanʒac.

⁹Guac iniŋhécga eeginaguc ionac sucginaiguc imi baera baera ic kewu ionac bérac hécginanéŋ kecʒu. Guac iniŋga qéʒianéŋ Ofiri baecac golinéŋ meʒeric amuma guac méra héigaiguc nanʒac.

¹⁰Béracna, gezac qema niŋna, gi geŋga ic embachécga ʒéma maŋgocgawac ama areŋa yanda imuac eluŋ gumac.

¹¹Imuhuc wanna ic kewunéŋ guac tanec héŋ sorocya imuac ewa siŋsiŋ waŋgémmac. Inéŋ mia guac miŋga wanʒac imuac sicgé miwésémaŋ.

¹²Ic kewu guac imi Tirowac béraranéŋ sese eeyaguc haigémmac. Waŋu imuac ic embac ʒuŋa masapu ginaguc imi eneŋ ewa hia waŋ énécmimac niŋac huluŋga késama yaiʒézé ac waŋgémmu.

¹³Guac béracganéŋ ʒuŋa masapuyaguc kecmac. Iwac séwi usuya imi golinéŋ biloŋgéma memeya.

¹⁴Béracga séwi usu kiwiyaguc imi wagiru guac muru hamac. Alahéra embac seraŋa imi eneŋ momacnec onagiru hamu.

¹⁵Waŋu onagiru ségiségi wamma ewa hia nimma ama kewuyaiguc keremmu.

¹⁶Guac naŋhécga ieneŋ guac yandahécga mératécgina mema naŋgic geŋ imi baera baera imuac baec galeŋ buŋa onopocbésémaŋ.