SALMOS 45:3-16

³Ximocualtlalili momachete para titlahuilanas, ta catli nelía amo timajmahui. Nelía tinesi tiyejyectzi pampa ta titlanahuatijquetl catli más hueyi.

⁴Xicahuayojtlejco huan xitlatlaniti ica nochi mohueyitilis. Ta tiquinmanahuía catli teicneltzitzi huan catli quichihuaj catli melahuac. Titetlajtolsencahua xitlahuac. Nelía huejhueyi tlamantli tijchihua.

⁵Tlatentili nopa cuatlamintli catli tijhuica, huan quinajsis ininyoltipa mocualancaitacahua quema tiquinmelactlachilis, huan tiquinmajcahuilis. Ma huetzica moicxitla nochime tlen campa hueli tlalme campa quintlepanitaj teteyome.

⁶Toteco Dios, titlanahuatis para nochipa huan amo quema tlamis. Quena, motlanahuatilis elis senquistoc xitlahuac.

⁷Tiquicnelía catli melahuac huan tijcualancaita catli amo cuali. Yeca Toteco Dios, yaya catli moTeco mitztequitlalijtoc titlanahuatijquetl, huan mitzmacatoc más paquilistli huan más tlatlepanitacayotl, que nochi sequinoc tlanahuatiani.

⁸Nochi moyoyo mijyotía ica nopa tlaajhuiyacayotl mirra, áloe huan canela. Huan mitzpaquilismacaj ica tlatzotzonali nepa ipan mochaj campa quiyejyectlalijtoque nochi tlapepecholi ica tlamantli catli tlahuel yejyectzitzi huan pajpatiyo.

⁹Iniichpocahua sequinoc tlanahuatiani quipiyaj nopa hueyi tlatlepanitacayotl para mitztequipanose. Huan ica monejmac mosehuijtoc nopa ichpoca tlanahuatijquetl catli elis mosihua catli quiyectlalijtoque ica oro catli onca tlali Ofir.

¹⁰Xijtlacaquili ichpocatl. Quena, xijtlacaquili cuali, nocone, catli nimitzilhuis: “Ayacmo xiquintoquili motatahua, moicnihua huan nochi catli timomajtoya tijchihua.

¹¹Nopa tlanahuatijquetl tlahuel mitzcualita, huan nelía paqui ica moyejyejca. Huajca monequi tijneltoquilis pampa ama ya moTeco.

¹²Hualase mitzpaxaloquij iichpocahua nopa tlanahuatijquetl tlen altepetl Tiro. Quena, catli más tominpixtoque ipan nopa altepetl hualase huan mitztlanemactiquij. Ya ni quichihuase pampa quinequise ximohuampoxchihua ininhuaya.”

¹³Nopa ichpoca monamictijquetl mocualtlalía ipan ichaj ica catli más yejyectzi. Yaya iichpoca se tlanahuatijquetl huan ama mocuilis ne tlanahuatijquetl catli hueyi. Onpano yejyectzi nopa ichpocatl ica iyoyo catli nelcuajcualtzi catli tlajtzontli ica oro.

¹⁴Quena, yejyectzi quiyoyontijtoque ica iyoyo tlajtzontli huan ama quihuicase iixpa nopa tlanahuatijquetl catli ihuaya monamictis. Itepotzco yase iichpocapoyohua catli quinnotztoc.

¹⁵Ica hueyi paquilistli calactiyohuij ipan nopa hueyi cali campa ichaj nopa tlanahuatijquetl.

¹⁶Tlanahuatijquetl, se tonal tiquinpiyas moconehua, huan tiquinmacas tequiticayotl para tlanahuatise quen mohuejcapan tatahua mitzmacaque. Quena, teipa tiquinpiyas motelpocahua catli mitzpalehuise. Huan tijchihuas ma tlanahuatica hasta campa hueli techaj ipan nochi motlal.