Salmo 42:5-11

⁵Apay pay laeng ay mariribok ya manladingitak? Sik-a, Apo di pantalkak, tan sik-a di omisalakan ya Diyos ko et sik-a kasin di idaydayaw ko.

⁶Peteg di ladingit ko, isonga ninemnem kos sik-a sin kawadak sin sakop di Jordan ay naiaddawi ay daga, sin sag-en di dontog ay Hermon ya Mizar, tan sina kayman di kad-ak ay lugar.

⁷Kaman napigsa ay dalloyon di inpaalim ay ladingit ko, et kamanak malmalned si sakit di nemnem ko.

⁸Inagew ay inpapailam ed idi di komakaman ay layad mo, ya sin labi, mapteng ay kankanta di inpanemnem mo ay say inkarkararag ko en sik-a ay Diyos ay poon di biyag ko.

⁹Diyos ay salaknib ko, enak kod damagen, “Apay ngin ay nilinglingam sak-en? Apay ngin ay magay saldeng di ligat ko ay idawdawat di makedse ay kaibaw ko?”

¹⁰Kamanak natenaw si bain ko begew sin kali da ay makainsolto. Kankanan da, “Into ngin di Diyos mo?”

¹¹Apay pay laeng ay mariribok ya manladingitak? Sik-a, Apo di pantalkak, tan sik-a di omisalakan ya Diyos ko, et sik-a kasin di idaydayaw ko.