SALMOS 42:5-11

⁵¿Biẕ chen' žat ni'a no'o, be' da' nakkza'? ¿Biẕ chen' že' zedlo' ḻo yichj ḻáẕda'wa'? Bx̱en ḻaže' Dios dan' wká'n ẕenkza' Ḻe' da' yoble. Nake' Benne' Weslá chia', na' Dios chia'.

⁶X̱ana' Dios, ba nat ni'a na' be' da' nakkza' ḻo yichj ḻáẕda'wa'. Che ḻen žezá' ḻaža'a chio' kate' ne zoa' ḻo yežlyó yecheḻa'ale yegw Jordán nga, ḻo ya'a Hermón gan že' Ya'a Misar.

⁷Ka nak žax̱to' da' žon nisdo', ka' žon to nis wbá'a chio', Dios. Ẕzaka' be' da' nakkza' dan' nis wbá'a dan' bselo'o ẕchen' neda'.

⁸Tža tža žeyache' ḻaže'l X̱anžon' neda', na' žel goḻkza' da' we ḻawa' Ḻe', na' wcháḻjḻena' Dios, Bennen' žonne' yeḻa' nban chia'.

⁹Yapa' Dios: “Le' žape chi'o neda'. ¿Biẕ chen' naḻ ḻažo'o neda'? ¿Biẕ chen' žak nyache' ḻaža'a dan' benne' bi ẕḻe'ele' neda' chawe' žsake'e neda'?”

¹⁰Žlagak žit yoa'a dan' benne' ka' bi ẕḻé'egekle' neda' chawe' žon dítjgekle' neda'. Tža tža ẕnnábgekle' neda', na' ẕnnagake': “¿Ganẕkze Dios chio'?”

¹¹¿Biẕ chen' žat ni'a no'o, be' da' nakkza'? ¿Biẕ chen' že' zedlo' ḻo yichj ḻáẕda'wa'? Bx̱en ḻaže' Dios dan' wká'n ẕenkza' Le' da' yoble. Nake' Benne' žeslé' neda', na' Dios chia'.