Mboe 42:5-11

⁵Mi parei ta iŋgi leleŋ isaana mini ma kembei? Parei ta leleŋ ipata? Nio aŋbotmbot ta kembei, na ambai som. Tana ko aŋur motoŋ pa Anutu mi aŋpase pini, mi aŋpakuri mini. Pa ni Merere tio mi ulaaŋa tio.

⁶Nio leleŋ ipata kat, mi aŋtwer ima pu. Pa iŋgi aŋmet ma aŋbot molo kat pu. Iŋgi aŋbot mar ta abal Hermon mi abal Mizar ta yok Yordan kunduunu i. Tana ko motoŋ ila mini pa mbulu ku.

⁷Pataŋana ta zem ma ise tio na, ina ilol yo ma aŋsaana kat. Iŋgi kembei mozo lukutuunu ka duubu boozomen timar mi tipolpol salakaala yo i. Mi kembei ta wo biibi itoktoogo raama kalŋaana biibi, mi ka belut isabeleu yo i.

⁸Tamen aigule ta boozomen, Yooba iurur leleene pio mi izzwe muŋaiŋana mi kampeŋana kini pio. Mi mbeŋ ta boozomen na, aŋpakurkuri pa mboe. Aŋkamam suŋŋana pa Anutu tio ta imborro mbotŋana tio na.

⁹Anutu, ni tuŋ ŋonoono. Pa ipombolmbol yo mi iporoukalkaala yo. Tana aŋzzo pini ta kembei: “Parei ta nu motom mbeleele yo? Mi parei ta gedgeede koŋ koi bizin, mi tikototo yo ma tikamam pataŋana pio? Re. Iŋgi aŋbotmbot raama leleŋ ipata kat.

¹⁰Aigule ta boozomen, zoŋ ise mi ila zoŋ isula na, koŋ koi bizin tikamam sua repiiliŋana pio. Mi tinoknok wiŋana pio ta kembei: “Anutu ku imbot swoi?” Tana sua kizin iwe kembei ta izi, mi iŋgalŋgal yo ma mburoŋ imap.

¹¹Mi parei ta iŋgi leleŋ isaana mini ma kembei? Parei ta leleŋ ipata? Nio aŋbotmbot ta kembei, na ambai som. Tana ko aŋur motoŋ pa Anutu mi aŋpase pini, mi aŋpakuri mini. Pa ni Merere tio mi ulaaŋa tio.