Salmo 22:1-10

¹Diyos ko, Diyos ko, apay nga tinmaynan ka? Ay daetan pay di adawag ko ay manpatolong en sik-a, ngem magay mas-ed kos badang mo tan kambaw inmaddawi ka.

²Inag-agew ya linablabi ay man-ad-adawagak en sik-a, Apo, ngem adim polos songbatan nan kararag ko, isonga adi inmon-onina nan ligat ko.

³Ngem ammok pay dedan ay Ari ka ay nangato. Sik-ay daydayawen di Israelita tan nasantoan ka ay Apo.

⁴Din ap-apo mi ed bayag et sik-a di nantaltalkan da et siya met kayman ay insalakan mos daida.

⁵Inlisim daida sin am-in ay kaeegyat idi nankararag da et adi da nadisdismaya idi sik-ay nantalkan da.

⁶Ngem mo sak-en, baken ipogaw di omibilangan di iib-a mo adi et kaman bigis ay magay silbi na ay sigaan ya laslasoyen da.

⁷Am-in ay omil-ila et somis-iyek da. Manwegweg da dowan dan omitidtidla.

⁸Kanan da, “Mo siya ay si Diyos di nantalkam, apay ngarud ay adi dakan badangan? Mo tet-ewan kanam ay laylayden daka, into ngin di mangisalakan en sik-a?”

⁹Ngem sik-a met ay Diyos di inmay-ayowan sin naianakak, siya abe sin kamoyang ko ay nansossosoak.

¹⁰Naitalekak en sik-a manlogi sin naianakak, sik-a din Diyos ko manipod sin naisikogak.