Salmo 135:1-10

¹Madaydayaw din Apo! Idaydayaw yo din ngadana, dakayo ay mansilsilbi en sisya,

²dakayo ay mansilsilbi sin beey di Apo, sin Timplon Diyos tako.

³Dayawen tako tan siged sisya, ikanta tako din ngadana tan managseg-ang sisya.

⁴Tan pinili na din Israelita ay manbalin ay ipogaw na.

⁵Ammok ay din Apo et manakabalin, nangatngato mo olay sino ay didiyosen.

⁶Amagena amin ay laydena ed langit ya isnan daga, sin baybay ya sin lanad na.

⁷Ipakayang na di liboo sin addawi ay solsolin di daga, kimat ay kakoyog di odan yan pawadaena, pabelaena abe din dagem sin pangidoldolinana.

⁸Ed Egipto yan pinse na amin ay besag di ipogaw ya animal da.

⁹Sinyal ay nakaskasdaaw et inpaipaila na ay manosa sin ari ya din amin ay tuturay na.

¹⁰Ad-ado ay nasyon di dinadael na, napipigsa ay ari yan pinse na: