SAAMUNƆ 55:8-20

⁸Mɛ́ wã mà gá mà utɛkii wɛtɛ, lɛ zàga'ĩa gbãaa tón ma lero yãnzi.

⁹Ǹ ń yã gboro, Dii, ǹ ń yã yãkↄ̃tɛńnɛ, zaakɛ má è zↄka kↄ̃n swèeo kú wɛ́tɛ guu.

¹⁰Aↄ̃è kpáɛ kɛ bĩi musu fãantɛ̃ kↄ̃n gwãavĩo, yã zaa kↄ̃n yã gbãaao di wɛ́tɛ guu.

¹¹Gbɛ̃dɛdɛyã bé à wɛ́tɛ pì pà, gbãamↄnnɛna kↄ̃n mↄnafikio è kɛ̃ à gãalɛro.

¹²Tó ma ibɛɛ bé èe ma sↄ̃sↄ̃ↄ yã, mɛ́ mɛna, tó ma zanguri bé à fɛ̀ɛmazi, mɛ́ utɛnɛ.

¹³Mↄde ḿbeee, mmↄn kɛ̀ wá sáa, ma gbɛ̃ndoo, ma gbɛ̃nna!

¹⁴Weè fàadi bo kↄ̃o yã nnanna, weègↄ̃ tɛ́kↄ̃zi parii tɛ́ Luda ua.

¹⁵Gaa é zãmba kɛ ma ibɛɛnↄnɛ, aↄ̃é si gɛ̀wãan ń gbãagurↄ, zaakɛ zaaa vɛ̃ɛkii è ń guu.

¹⁶Mapi sↄ̃, mɛɛ̀ Luda sísi, Dii è ma mì sí.

¹⁷Kↄngↄ, fãantɛ̃ kↄ̃n uusiɛo mɛɛ̀gↄ̃ ma yã'ↄ̃ammanↄ bↄɛɛnɛ kↄ̃n m̀bnao, bensↄ̃ è ma yã ma.

¹⁸Baa kɛ̀ ma ibɛɛnↄↄ pari, è ma sí à ma bↄ swèen aafia.

¹⁹Luda ègↄ̃ vɛ̃ɛna kpatan gurↄ píngi, eé ma yã ma, eé wí daḿma, zaakɛ aↄ̃è ń dà liɛro, aↄ̃ↄ Luda vĩa vĩro.

²⁰Ma gbɛ̃ pì swèe kɛ̀ kↄ̃n a gbɛ̃nↄo, à bↄ̀ lɛdolɛ kɛ̀ aↄ̃ↄ kɛ̀ kↄ̃o kpɛɛ.