GWAY GI IDAWUU’D 55:8-20

⁸Aha/ mina lala ki jahanneyi dhali gama darha’dam pem ’peni mo ma bumburush ’tham mo dhali ’thama p̱unthar mo.

⁹’Ce’di tom buni jin thosona uni sho’k sho’k mo ma, ayy Tap̱a. C̱umbulki uni ale’d buni mo, haali/ aha/ hilkina mo jin bujura bujur mo dhali mo jin biruwa bir e ’peŋkuman bampa/ mo.

¹⁰Montee dhali mon’thiny uni iikin ka kul is e yana gaŋgaram piti mo, dhali mo jin tanuwa pibi dhali mo jin ṯoju bwa mo tani ’kon e uni mo.

¹¹Mo jin doru sho’k ka pupush mo tani a’di di’d e bwaman a’di mo, dhali mo jin sirijuwa siri’c ki sho’k mo dhali mo jin hekuwa he’k e mo tani uni ’koki ii mo ’peni mo ma suug piti mo.

¹²A’di diki ta a’di jin ta ’kup̱ ki aha/ jin ’bakaa e mo – ki aha/ mina ’taki mish a’di ḵal mo. A’di diki ta a’di jin ta ’kup̱ ki aha/ jin ṯu/ul mo jin gora bwa ki gor ap̱o/ aha/ mo, ki aha/ mina ’taki bag ’peni a’di mo.

¹³Hili /e be, jin wa e ki aha/ ki is pem mo, /e jin nyaḵ ya ki aha/ mo, dhali /e jin tana waḵ pem mo.

¹⁴Me’dyin mo ana nyaḵa ṯor ṯori monṯal ’de/ mo jin ’kunya’kuny mo. E gu’b ma Arumgimis mo tani ana iina mmonyaḵ to mii mo.

¹⁵Dhalki mowu p̱u’du’d ap̱o/ uni mo. Dhali dhalki uni ’donu ki e eya Haawiya mo. Dhali dhalki uni iin e bwaya pure/ gi moŋ’kup̱ajem buni mo.

¹⁶Hili aha/ yuḵkina Arumgimis mo. Dhali Tap̱a midi ta aha/ is is ki me’d mo.

¹⁷Mom’pimpili/ dhali mon’thamo/ dhali montee mo tani aha/ bahkina gwo ma ’thup̱in ’twam pem mo dhali ko mo, dhali a’di midi ciḵ ’twam pem mo.

¹⁸A’di midi ’cuḵa ḵashiram pem ki ’dantar mo ’peni mo ma mee jin miga/ ’taki as mo, haali/ ’kwani tana ris miina bumburusha p̱o/ aha/ mo.

¹⁹Arumgimis midi c̱i ’cem piti mo dhali dhu uni ki gwa’d mo, a’di jin diki’d eya ḵursi ma maliḵ kadhamo/ mo. Haali/ uni ’koki dhu gwoŋḵan jin c̱inu mo dhali uni ’koki ḵo/ Arumgimis mo. Doshi ma dhali ’cunycuri yan mo.

²⁰Amannyaḵ yam pem a’di he’thki’da bim piti mo ap̱owa mugum piti mo, a’di ’ce’dki gwom piti jin gama a’di me’d mo.