SAAMUNƆ 40:5-15

⁵Dii ma Luda, n yãbↄnsaɛkɛnanↄↄ pari, weé fↄ̃ wà yã kɛ̀ nɛ́ɛ pɛɛawee dↄdↄro. Tó mɛ́ɛ tↄ̃kɛ̃ɛnnɛ, à lɛ́ vĩro, mɛ́ fↄ̃ mà o píngiro.

⁶Ń ye sa'opↄ ke gbaaziro, ben n ma gba swã mà yã mao. Nɛ́ɛ sa'opↄ kɛ̀ wè ká tɛ́n à tɛ́ kũ ke durun agbaakpabↄ gbekaro.

⁷Ben ma bè: Maɛ kɛ̀, ma mↄ lán wà kɛ̃̀ takadan ma yã musu nà.

⁸Má ye n pↄyezi kɛmɛ, ma Luda, n doka kú ma swɛ̃̀ guu.

⁹Mɛ́ yãzɛdee baaru kpá pari kakↄ̃ana guu, mɛ́ ma lɛ́ nakↄ̃aro, lán ń dↄ̃ nà Dii.

¹⁰Mɛ́ɛ n yãzɛdee utɛńnɛro, ma n náanɛ kↄ̃n n mìsinao yã ò. Mɛ́ɛ gí n yenzi kↄ̃n n yãpuraao o pari kakↄ̃ana guuziro.

¹¹Dii, ǹton gí ma wɛ̃nda gwaziro, n yenzi kↄ̃n n yãpuraao gↄ̃ ma dãkpaa.

¹²Zaakɛ yã zaaa kɛ̀ liganamazi lɛ́ vĩro, ma taarinↄ dàmala, mɛ́ɛ guu eero, à pari dɛ ma mìkãla, swɛ̃̀ kɛ̃̀magu.

¹³Dii, ǹ sùu kɛ ǹ ma mì sí, Dii, ǹ kɛ kpakpaa ǹ mↄ́ ǹ dↄmalɛ.

¹⁴Ǹ tó wí gbɛ̃ kɛ̀ aↄ̃ↄe ma wɛɛ wà ma dɛɛnↄ kũ, aↄ̃ ń mì pɛ́ɛ. Ǹ tó gbɛ̃ kɛ̀ aↄ̃ↄ yezi mà mↄ́nzi eenↄ kpɛɛ li, aↄ̃ uu yãkↄ̃tɛ.

¹⁵Gbɛ̃ kɛ̀ aↄ̃è bemɛ taalɛ taalɛɛnↄ, ǹ tó wí ń kũ aↄ̃ kɛ gìri.