Ronm 3:4-19

⁴Awa! Sa Bondyé di toujou vwé menm si tout moun sé an mantè. Kon lévanjil-la di, “Dépi ou menm Bondyé palé, tout moun kay wè nètaman sa ou di-a sé lavéwité, épi népòt lè ou fè défans kòʼw, ou kay moutwé moun sa ou fè-a dwèt.”

⁵Mé lè nou fè mové, si sa ka moutwé aklè mizi dwèt Bondyé dwèt, ki sa nou kay di? Ès si nou kay di Bondyé pa dwèt kon i ka pini nou pou movèzté sala? (Mwen ka palé kon an nonm té kay palé.)

⁶Awa! Paski si Bondyé pa dwèt, ki mannyè i ka fè jijé latè-a?

⁷Mé si kon mwen ka fè mové-a, sa kay édé moun wè mizi dwèt Bondyé dwèt épi i kay jwenn pli lonnè pou sa, pouki mwen kondanné toujou kon an péchè?

⁸Ében pouki ou pa ka annèk di toubonnman, “Annou fè movèzté, paski sé bonté nou kay jwenn?” Pou byen diʼw, an chay moun ka ensilté mwen épi yo ka sali non mwen pou sa, paski yo di sé sa mwen ka pwéché. Kanmenm Bondyé kay kondanné sé moun sala menm kon yo méwité.

⁹Ki sa nou sa di pou vwé? Nou sé Jwif-la pli mèyè pasé sé sa ki pa Jwif-la? Awa! Paski fini nou fini moutwé mannyè nou tout, Jwif kon sa ki pa Jwif, anba pouvwa péché.

¹⁰Kon i ékwi an lévanjil, “La pa ni pyèsonn ki ka viv dwèt, pa menm yonn.

¹¹La pa ni pyèsonn ki ka konpwann. La pa ni pyèsonn ki ka gadé pou Bondyé.

¹²Yo tout ja tounen do yo asou Bondyé, yo pyès pa vo anyen. Pyèsonn pa ka fè sa ki bon, pa menm yonn.

¹³Lè yo ouvè bouch yo pou palé, i menm kon an twou ki ouvè an tè-a pou valé moun. Épi yo ka sèvi lanng yo pou toujou kwennen moun. Dèyè lèv yo ni vlen menm kon an danjéwé sèpan.

¹⁴Tout lè yo ouvè bouch yo pou palé, yo toujou ka jiwé, épi pawòl yo toujou anmè.

¹⁵Yo ka gadé pou tout ti chans yo jwenn pou yo sa tjwé moun,

¹⁶Toupatou yo pasé yo ka kité an ling mizè épi soufwans.

¹⁷Yo pa konnèt ki mannyè pou viv an lapé.

¹⁸Konsyans yo pa ka janmen ba yo pou yo sa abésé kò yo douvan Bondyé.”

¹⁹Bon, nou sav tout bagay ki matjé an lwa-a matjé bay sé moun-an ki anba lwa-a. Kon sa pyèsonn pa sa ni an èskiz, épi nou kay wè mannyè tout latè-a koupab douvan Bondyé.