Maroma 3:4-19

⁴Kenzi kuvi vulyo. Kono, musiye Ireeza a wanike kuva wina initi, Niha kuva kuti muntu ni muntu wina mapa. Sina hakuva ñoletwe, ili kuti muvoniswe kuluka mu manzwi enu, ni kukoma chimweza kuatulwa.

⁵Kono heva kusa luka kwetu niku tondeza kuluka kwe Ireeza, tuwola kuwamba nzi? Kana Ireeza kalukite hanyandisa cha kuvenga? Niwamba cha kuya ka mano a muntu.

⁶Sanzi nikuvi vulyo! Hakuva vulyo Ireeza ka watule vule inkanda?

⁷Kono heva vuniti vwe Ireeza cha mapa angu vuleta kulumba Ireeza kusamani, chinzi hanisi atulwa kuva ni muezalivi?

⁸Chinzi kusa wamba, sina hatuwambiwa cha mapa kuwamba, mi sina vamwi havazumina kuti tuwamba, “Tupange vuvi, nji kuti vulotu vwize”? Inkatulo havali ilukite.

⁹Linu chinzi? Tulizwisa kuvamwi? Nanta. Chituva hambilizi kale ma Juda ni ma Gerike vonse, cha kuva mwi konde lya chivi.

¹⁰Ichi china vuti kamuchi va ñolelwe: “Kakwina yolukite, nanga yenke.

¹¹Kakwina yo zuwisisa. Kakwina yogana Ireeza.

¹²Vonse vava sanduki. Hamwina vava sanduki kusava ni ntuso. Kakwina yopanga vulotu, nanta, nanga yenke.

¹³Mimino yavo ivita lyi yalukite. Malimi avo ava chengi. Chifanu che nzoka china kunsi ye milomo.

¹⁴Tuholo twavo twizwile zikuto ni vuvi.

¹⁵Matende avo mahuvilila kukwi tila malaha.

¹⁶Insinyeho ni masukuluka zina mwi nzila zavo.

¹⁷Ava vantu kaveni kwiziva inzila ye nkozo.

¹⁸Kava tiyi Ireeza mumenso avo.”

¹⁹Hanu chitwizi zonse ziuwamba mulawo, uwamba kuvena mwi konde lyamulawo. Ili nji vaka lyo kuta kuti tuholo tonse twi yale, ili kuti inkanda yonse ive ni vuikalavelo kwa Ireeza.