Roma 3:4-19

⁴Akaé! Ba wiàna rà pwâ wà tèpa âboro, â wà Pwiduée, âna wàé Pwiduée na é *tàrù, â é nye wakè na âjupâra. Ba jèe nye wii naa na *Tii Pwicîri pâ: Na gà tùra, co Pwiduée, â gà tàrù ma âjupâra. Tèpa âboro diri, âna rà côoina popai'gà. Â gà nye ciburà piétò, jii tàpé na rà pitòtigà. Psaume 51.6

⁵Napwa naa goo pâ tûâ kâjè na èpà, âna rà paari pâ, nye ticè èpà goo Pwiduée. Â gée goo kaa pwiri, â rà ina pàra tàpé pâ: «Càcaa wâdé wiàna é pwa wârimuru tâjè wà Pwiduée, ba pâ tûâ kâjè na èpà, âna paari pai wâdé kêe!»

⁶Akaé! Ba wiàna wàrapwiri, â pwiri càcaa tàrù ê pai pwa kà Pwiduée, â pwiri o wànau târa cè pai tèi kêe tèpa âboro ni gòropuu?

⁷Â wâgà, pwiri gà pwacèwii tàpéebà, â gà gére niimiri pâ ‘Ê pâ tûâ kôo na èpà, âna paari pâ, piwéna jiijè ê pwina é pwa wà Pwiduée. Â jè côoinari pai muugère kêe goo. Êkaa na càcaa tàrù na é pwa wârimuru tôo goo wà Pwiduée.’

⁸Bwa. Gà cibwaa ina pwiri. Ba nye ipaiwà na jè ina pâ: «Wâdé na jè pwa na èpà, ba na o tèepaa ê pwina wâdé!» (Â pwa pàra tèpa pwâ na rà ina pâ, go ina pwiri. Â wà tàpéebà, âna pâri ma pwa wârimuru tàra.)

⁹Jè ina pâ wànau naa goobà, wàibà tèpa Juif? Gona bà piwéna jii wà pàra tàpé na ara Pwiduée? Bwa! Càcaa wàrapwiri! Ba go jèe nye ina pâ: Êdiri pâ âboro, âna rà jèe cau piênawéna kâra ê auniimiri kàra na èpà—wà tèpa Juif ma wà mwara tàpé na càra caa tèpa Juif.

¹⁰Ba jèe wii naa na Tii Pwicîri pâ: Nye ticè pwi jè âboro cèna é tàrù na ara Pwiduée. Nye ticè ji pwina caapwi wàé!

¹¹Nye ticè jè âboro cèna é wâro naa âjupâra. Nye ticè pwina é mudà Pwiduée!

¹²Rà nye cau naa càùrà naa goo Pwiduée. Rà cau tèpa âboro na rà èpà. Nye ticè na pwa na wâdé. Nye ticè ji pwina caapwi wàé! Psaume 14.1–3

¹³Na rà tùra, âna pimo; piârailu ûmemeerà. Ba rà pigòé ma tubé. Psaume 5.10 Popai kàra, âna pwacèwii aru. Rà utijè pwacèwii dòèa. Psaume 140.4

¹⁴Maina tojii na pwârà. Jè maagé goo pwâratùra kàra. Psaume 10.7

¹⁵Rà nye itàa co, nau ipòtàmwara.

¹⁶Wâna rà pâ wê, na rà tòdidiri. Rà câmi ê aré ma tojii.

¹⁷Càra caa tâmogòori ê naigé mara pinaanapô. Ésaïe 59.7–8

¹⁸Ba càra caa papwicîri Pwiduée. Psaume 36.2

¹⁹Napwa naa goro ê *Naèà, ma ê pâ popai na wâna, âna mara tatée wà tàpé na é naa ba kàra ê Naèà wà tèpa Juif. É paari diri pâ tûâ kà tèpa âboro na càcaa *tàrù na ara Pwiduée, â na ée mwa pitèirà goo. Â nye ticè jè âboro naa gòropuu diri cèna pâri ma é ipwamuruê.