Roma 3:4-19

⁴Bisa boe! Masi ka dhèu aaꞌi-aaꞌi ètu rai-haha ne kapodꞌe-kabèli, te ngaa Ama Lamatua padhai lii dhu mola taruu! Sanèdꞌe, te dhu suri tèke ètu Sasuri Mola-Mèci lula-nèti ngiꞌu Lamatua, peka na, “Abhu dhèu dhu pèci sasala, peka na, Nèngu pamaꞌète lii langu dhu bia cabèka. Te ngaa pe rèngu reꞌa, na, ngaa dhu Na peka-padhai èèna lèke tareꞌa. Nèngu tatu segi, lula Na bisa boe padhai lii sale.”

⁵Te ngaa ladhe èdhi tao sala, èèna ka dhu peka paledꞌa mi dhèu aaꞌi-aaꞌi, ngaa dhu Lamatua tao èèna mema lèke tareꞌa. Ladhe sèmi èèna, èdhi peka ngaa hari? Neo peka, na, Lamatua adil boe ladhe Na huku èdhi, do? (Te abhu dhèu cahagꞌe dhu padhai lii sèmi èèna.)

⁶Bisa boe! Lamatua sala boe ladhe Na huku èdhi. Lula Na dènge hak ho huku dhèu dhu tao sala ètu rai-haha ne.

⁷De ladhe jaꞌa padhai lii monya, èèna peka na, hahuku Lamatua lèke tareꞌa. Ladhe jaꞌa padꞌelo dadedha Na sèmi èèna, nga tao ka Nèngu parisa mamuri jaꞌa, ka pamaꞌète lii langu jaꞌa, na, ngaa dhu jaꞌa adꞌu-ue ne, sala?

⁸Baku sèmi èèna! Ladhe madhutu ka ngangee sèmi èèna, miu madhutu dhèu dhu peka, na, “Hudꞌi laa èdhi tao bhelu-katubꞌa ae risi hari, sèna ka jꞌara beꞌa asa tabha ae kahèi!” Dhèu dhu peka sèmi èèna, pantas abhu huku. Te ngaa abhu dhèu dhu paꞌele iie kolongara jaꞌa, peka na, jaꞌa ka ajꞌa dhèu sèmi èèna.

⁹De tasamia? Miu pangee, na, èdhi dhèu Yahudi beꞌa risi nèti dhèu Yahudi boe, do? Aadꞌo! Te jaꞌa peka le dènge miu, na, dhèu aaꞌi-aaꞌi dhu manahu le asa dꞌara sasala, masi ka dhèu Yahudi, do dhèu Yahudi boe.

¹⁰Te dhu suri mema ètu dꞌara Sasuri Ama Lamatua dhu Mola-Mèci, na, “Abhu boe ca dhèu sa dhu mamuri mola taruu. Èci sa aadꞌo!

¹¹Abhu boe ca dhèu sa dhu reꞌa mèu jꞌara-jꞌara Ama Lamatua. Abhu boe èci sa dhu neo patadha dènge Lamatua.

¹²Rèngu pakajꞌèu le nèti jꞌara mamuri dhu mola. Ka rèngu se guna heka mi ngaa èci sa. Abhu boe ca dhèu sa dhu padꞌelo dꞌara beꞌa. Èci sa aadꞌo hèi!

¹³Lii padhai ra dhu hèu bhobꞌo, nuka sèmi roꞌa dhèu madhe dhu ra kèi hari. Nèti dꞌara hèbꞌa ra kalua dhoka lii kapodꞌe-kabèli di. Lii dhu kalua nèti dꞌara hèbꞌa ra, nuka sèmi raco mege.

¹⁴Hèbꞌa ra reꞌa dhoka padhèdꞌa di, aa lii padhai ra karehe, dhu papèdꞌa dꞌara dhèu, te èèna ka dhu mai nèti dꞌara rèngu dhu karehe.

¹⁵Reꞌa boe madhaꞌu ladhe pamadhe dhèu.

¹⁶Sadꞌi rèngu ètu mia èèna ka, na, lii langu, muri ètu èèna, aa pasusa rupa-rupa mi dedha dhèu.

¹⁷Mamuri ra dhu reꞌa boe padame, aa reꞌa boe mamuri dènge dꞌara dhu mau.

¹⁸Rèngu se bisa boe taha rare dꞌara ra, lula dènge boe dꞌara madhaꞌu ciki sa mi Ama Lamatua.”

¹⁹De èdhi teꞌa, na, Lamatua hia Atora Na mi dhèu dhu pahaha iisi mi Atora sèra. Dènge sèmi èèna, dhèu abhu boe alasan ho siri iisi, peka na, rèngu se, dhèu dꞌara mola. Ladhe dhèu aaꞌi-aaꞌi ètu rai-haha ne hudꞌi paraga ku dènge Ama Lamatua, te Nèngu ka dhu jꞌue lii langu dhu peka na, sala do aadꞌo.