Roma 3:4-19

⁴I aric kereŋne! Anutu e buc mume sasanaŋ â ŋic ine mumu dodocne, iŋuc muzo. Miti qâreŋ moc ʒiŋuc hâcne fokac: “Go mumutiŋgezi dâŋfâri eocmu, â mumutaragezi ɋaɋacne eocmu.”

⁵Eme hehesic‐nâŋeczi Anutu tiŋne‐ticnere fuŋne bajaŋgeŋkekacte weniŋuc muzo? Ʒiŋuc muzo me? “Fuŋne iŋuc fokacte Anutuzi irec okacne nâreme mi sâckeocmu.” (Dâŋ i ŋic mamanare sâcko mukopac.)

⁶I aric kereŋne! Anutu e hehesic‐nâŋecte okacne nâreme sâckeocmu. Mâc muzac wemocko mâreŋŋic ʒeŋgoma dâŋnâŋec sâcne mutarazac.

⁷Eme ŋifec ine burecdâŋ‐nanezi Anuture dâŋfâri dopeckeme ʒâŋe biŋe‐ticne irec erâ fekacko wemocte sifu no wâc sâqocne bapa munarehuc okacne nareekac?

⁸Erâ wemocte ʒiŋuc mi mueŋgopeneŋ: “Sâqocne bapene ŋerisierâ fârine biaŋne fuaoc me.” Nâŋe iŋuc mueŋgopeneŋ munârehuc micko âkec enâreeŋgopieŋ hâcne. Dâŋ iŋucne muhuc hata i âteeŋgopieŋ jaŋe okacne fua‐jareme sâckeocmu.

⁹Eme weniŋuc? Judaŋiczi ŋic gâcne jowarurâ sâc moc juŋgopeneŋ me? I aricne jâmbâŋ. Biac mumbeneŋ, Judaŋic â Grikŋic nânâc mâmâc sâqocnere kiŋaŋ qaeŋgopeneŋ.

¹⁰Dâŋqâreŋ moc ʒiŋuc hâcne fokac: “Ŋic moczi tiŋne moc mi jukac, aric ɋaɋacne;

¹¹moczi mamanahec moc mi jukac, moczi Anutu wira basac mi ecneekac.

¹²Jaŋe qâsoriekicne sasawa, ʒeŋgoma repirembiŋ; moczi moc wiac biaŋne mi eekac, arictac jâmbâŋ.

¹³Marac‐jeŋic i hâmoc qâŋɋâŋ bâbâfua, nameŋ‐jeŋic forisieme eatuc dâŋ wefuekac, qotâ marasiŋ kisoŋnerâ jueŋgopieŋ.

¹⁴Bipic‐jeŋic sâwec â aaric dâŋte gegerockeekac.

¹⁵Ʒikare kike afec jueŋgopieŋ.

¹⁶Ima samaki bahuc tuhu bâfuaeŋgopieŋ.

¹⁷Wamare hata ine kâuc baeŋgopieŋ.

¹⁸Â ʒâŋe mai‐jeŋicko Anuture hâhâwic mi fokac.”

¹⁹Nâŋâc ʒiŋuc manaeŋgopeneŋ: Sâcmutâc dâŋ i dâŋ rune nâŋe nâzâkicne. I ŋic sasawa fuŋne‐nâŋec rituhuc micnâŋec ɋâtâocte ekicne. Eme ŋic mâmâc sasawa kiŋnâŋec Anuturao fua‐fârekac.