Rom 3:4-19

⁴Bar puvatɨ! Gumaziba bar ifari, ezɨ God uabɨra zurara guizbangɨra mɨgei. Godɨn Akɨnafarimɨn osizirim kamaghɨn mɨgei, “God, nɨ mɨgeima, gumazamiziba fo, nɨ guizbangɨra mɨgei. Egh me nɨn araziba tuisɨghɨva me fogh suam, nɨ arazir kuratam itir puvatɨ.”

⁵Ezɨ manmaghɨn ami? E kamaghɨn mɨkɨm suam, en arazir kuraba ti Godɨn arazir aghuiba azenim garɨsi? O, e kamaghɨn mɨkɨm suam, God en arazir kuraba ikarvagha ivezir kuraba e ganɨga, kamaghɨn a ti arazir kuram gami? (Mɨgɨrɨgɨar kaba, nguazimɨn itir gumazibar mɨgɨrɨgɨabar mɨn zui.)

⁶Bar puvatɨ! God deraghan koghɨva, manmaghɨn gumazamiziba bar men araziba tuisɨgham? Bar puvatɨ, an araziba dera, kamaghɨn a gumazamizibar arazir kuraba ikarvasi.

⁷Gumazitam kamaghɨn mɨkɨm suam, “Nan akar ifavarim, Godɨn guizɨn akam gamizɨ, an azenim girɨ, egha an ziam gamima an ekefe. Egh manmagh su, God na mɨkɨm suam, kɨ gumazir arazir kuram gamim, egh nan arazir kuram ikaragham?”

⁸Mɨgɨrɨgɨar onganir igharazir mamra kara: “Aria, e arazir kuram damutɨma arazir aghuim otivam.” Gumazir maba akam na gasa ghaze, kɨ kamaghɨn bizibav gei! Kamaghɨn God me gasɨghasɨghtɨ, bar deragham.

⁹Ezɨ manmaghɨn ami? E Judaba ti Kantrin Igharazibar Gumaziba Godɨn damazimɨn me gafira? Bar puvatɨ! Kɨ mɨkemegha gɨfa, Judaba ko Kantrin Igharazibar Gumaziba sara, arazir kurabar gavgavim bar e avarazɨ e an apengan iti.

¹⁰Godɨn Akɨnafarim bizir kam kamaghɨn a mɨgei, “Gumazitam Godɨn damazimɨn derazɨ puvatɨ. Bar puvatɨ.

¹¹Gumazitam fofozir aghuim itir puvatɨ. Gumazitam God buri puvatɨ.

¹²Gumaziba bar tuavir aghuim ataki. Gumaziba bar pazav ami. Men tav arazir aghuim gamir puvatɨ. Bar puvatɨ.

¹³Men akar toriba mati gumazir moziba akaba akari; kamaghɨn me mɨgeima ovevem otifi. Me akar ifavarir bar avɨribagh ami. Egha men akar toriba gumazibagh asɨghasɨzir mɨgɨrɨgɨaba bar izɨfa, mati kuruzir kurabar imezim.

¹⁴Dughiaba zurara me akav ghuriaba gumazibagh arɨgha, mɨgɨrɨgɨar gumazibagh asɨghasɨsibagh amua osɨmtɨziba me garɨsi.

¹⁵Me zurara atamra ghua gumazibav sozi, me ariaghɨri.

¹⁶Me aruava bizir gumazamizibar dabirabim gasɨghasɨzibagh amua, egha mɨzaziba ko osɨmtɨziba me garɨsi.

¹⁷Me navir amɨrɨzimɨn tuavim gɨfozir puvatɨgha igharaz darasi ko deragha apiaghɨri puvatɨ.

¹⁸Me tong bar Godɨn atiatir puvatɨ.”

¹⁹E fo, God kamaghɨn ifonge, an kotɨn dughiamɨn Judaba ko Kantrin Igharazibar Gumaziba sara, me Godɨn arazir gumazamiziba tuisɨzim riagh egh mɨgɨrɨgɨatam damighan kogham. Kamaghɨn God, Moses Osirizir Araziba isa, Judabagh anɨngi. Eghtɨ me dar gɨn mangɨ dar apengan ikiam.