LOMA 3:4-19

⁴Omi wahalamanena kaliva ma hiveveꞋafwayafwaya tu Yaubada keke-moꞋa gidafwaya. Au gavaimi gigahe medemi gigugai. Meda anafaiweya Veyao Tuwaina ana buki gigahe gigayo, KaꞋi O Yaubada unagahe, au makewa kaliva moyaꞋaidi ya gahe au velemoꞋena ma hinaꞋitahalamanena. KaꞋi kaliva hinahawavekoyoye, au makewa yadi gahe fwaya ma kabuꞋavane ginayemu. Hidedemi tokaiwabu Devida Veyao Tuwaina ana buki againe gigahe.

⁵Tu tamo hakwadi hida babi ana nuwanuwa amine ginagahe ginagayo, “KaꞋi ide kahuluva koyona, au mali kaliva Yaubada yana huluva tunutunugi-moꞋena himaduꞋitana. Gavadi-yo yada koyona againe Yaubada yana huluva tunutunugina kakivemahalina nonogana givematahiwadiyeda? Bana hima Yaubada keke tunutunugina.” KaꞋi hidede amine kanagahe o kaꞋi keke? Keke, keke-moꞋa!

⁶Yaubada gihuluhuluva tunutunuginaga. KaꞋi Bana keke kaliva tunutunugina digo, kadu keke tomiyababi moyaꞋaida anafaiweya ginavedewayaugida.

⁷Kadu kaliva saꞋeyana ginagahe ginagayo, “Yaku fwaya againe kaliva Yaubada yana gahe au velemoꞋena ma himaduꞋitana. Gavadi-yo yaku fwaya Yaubada yana kaiwabu gikivetubugina nonogana tokoyona adi matahiwadi giveledi amine aku matahiwadi ginaveleku?”

⁸KaꞋi medema gahe velemoꞋena digo, kaliva tufoidi kadu hinagahegahe hinagayo, “Kanahuluva koyona be higa mali kaliva yada koyona againe Yaubada kaliva hagihagi-moꞋena ma hinamaduꞋitana.” E, kaliva tufoidi hiveyaineku higa vaita mena gahe-nadi amine gadavehawala. Gaveyao medede amine higahegahe, medema gilubodadi be adi matahiwadi hinanuhagana.

⁹Hida kagahe ime miYuda yamumu moyaꞋaina anuhagana. Medema faꞋina gavaimi kananuwanuwa? KaꞋi ide miYuda badi yoꞋo tulidiyao kalivai-dina Yaubada matane katubuhegedi o kaꞋi keke? Keke, keke-moꞋa! Nuwanuwa koyona ide miYuda givehimeyeda kadu omi yoꞋo tulimiyao kalivai-mina givehimeyemi, au moyaꞋaida koyona ana kaliva, ada ita leleleya.

¹⁰Meda Veyao Tuwaina ana buki gigahe gigayo, Keke tamo hakwadi yegayegana Yaubada matane, keke-moꞋa.

¹¹Keke tamo hakwadi eda tunutunugina gidahalamaneni, keke tamo hakwadi Yaubada gidaleleleni.

¹²Kaliva moyaꞋaidi Yaubada yana eda hihegena, moyaꞋaidi yadi nuwanuwa balana keke tamo hakwadi gidahuluva yamumuna, keke-moꞋa.

¹³Yadi gahe vaita lahi yauyaugina ana lada amine. Meyadi fwaya againe gimaga. Yadi veyaina ma vaita oloto awabugodi koyona amine.

¹⁴HinuwanuwakoyoveꞋine faꞋina wonakoyokoyo agaidiya awadi gimaga.

¹⁵HimaduveꞋamunumunuga be higa kaliva hinaluveꞋalikadi.

¹⁶Fafali moyaꞋaina agaidiya hinunudadana kaliva koyodiyao adi iyaꞋiyaya gidadauda, aseꞋuꞋaulolo kadu kaliva adi kivekoyo.

¹⁷Kukuya ana eda keke hidahalamaneni.

¹⁸Yaubada keke maꞋita hidamatauseni. Au hidedemi Yaubada kaliva moyaꞋaida yada dewa faꞋina Veyao Tuwaina ana buki againe gigahe.

¹⁹Tu ide miYuda kahalamanena Yaubada vehimeya tulina tulina agaideya gisena, ada gilubodada be vehimeyai-dina matatabudi kanaꞋitaveꞋavidi. Atu keke kadaꞋitaveꞋavini faꞋina, ide miYuda kadu omi yoꞋo tulimiyao kalivai-mina buye kahuluhuluva koyona ma moyaꞋaida Yaubada matane kaveꞋamata. E, Yaubada ide tomiyababi moyaꞋaida yada koyona faꞋina ginavedewayaugida be ada laufata ginaveleda.